​ផ្លូវជាតិលេខ​ ៤ ប្រឈម​នឹងការជន់លិច​ដោយសារជំនន់ទឹកភ្លៀង​

​កំណាត់ផ្លូវជាតិលេខ ៤ ​ស្ថិតនៅត្រង់ចំណុចស្ទឹងសំរោង ​ស្រុកកំពង់សិលា ​ខេត្តព្រះសីហនុ ប្រឈម​នឹងការ​ជន់លិចដោយសារជំនន់ទឹកភ្លៀង គ្រាដែលកម្ពស់ទឹកបានហក់ឡើងជាបន្តបន្ទាប់ ជិតដល់ចំណុចប្រកាសអាសន្ន។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧត្តុនិយមប្រាប់កម្ពុជាថ្មី នៅរសៀលថ្ងៃទី ១២ ខែកក្កដានេះថា តំបន់មាត់សមុទ្រពិសេសគឺខេត្តកោះកុង និងខេត្តព្រះសីហនុ ត្រង់ចំណុចស្ទឹងសំរោង ស្ថិតក្នុងស្រុកកំពង់សិលា ឥឡូវនេះទឹកចាប់ផ្ដើមលិចតំបន់ទំនាបមួយចំនួន នៅសងខាងស្ទឹង ហើយអាចនឹងបន្តកើនឡើងទៀត ដោយសារភ្លៀងនៅតែបន្តធ្លាក់។

លោកប្រាប់ថា “ឥឡូវនេះកម្ពស់ទឹកកើនឡើងដល់ ៥.៤៥ ម៉ែត្រ ហើយកាលណាតែឡើងដល់ ៥.៨០ ម៉ែត្រគឺស្មើនឹងថ្នល់ ហើយអាចលិចថ្នល់មុន ព្រោះថ្នល់ទាបជាស្ពាន”។

កន្លងមកមានភ្លៀងជាបន្តបន្ទាប់ពិសេសនៅថ្ងៃទី ១១ ហើយឥទ្ធិពលនេះ នឹងអូសបន្លាយជាបន្តបន្ទាប់រហូតដល់ថ្ងៃទី ១៤ ខែកក្កដា ហើយភ្លៀងធ្លាក់ខ្លាំងជាពិសេសតំបន់មាត់សមុទ្រ និងតំបន់ខ្ពង់រាបប៉ុន្តែតំបន់ខ្ពស់រាបឃើញមានការប៉ះពាល់ដែរ ប៉ុន្តែប៉ះពាល់តិចតួចទេ នៅស្រុកកែវសីមា ខេត្តមណ្ឌលគិរី និងផ្លូវឡើងទៅខ្នងភ្នំព្រះវិហារមានការរអិលថ្ម ពេលមានភ្លៀងហូរច្រោះដីនាំឱ្យធ្លាក់ថ្ម ប៉ុន្តែការប៉ះពាល់មិនជាធ្ងន់ធ្ងរនោះទេ៕