អាជ្ញាធរបើកឲ្យចរាចរឡើងវិញ ត្រង់កំណាត់ផ្លូវជាតិលេខ ៤ ត្រង់ចំណុចស្ពានស្ទឹងសំរោង

រដ្ឋបាលខេត្តព្រះសីហនុ បានជូនដំណឹងអំពីការបើកឲ្យចរាចរឡើងវិញ ត្រង់កំណាត់ផ្លូវជាតិលេខ ៤ ត្រង់ចំណុចស្ពានស្ទឹងសំរោង ចន្លោះគីឡូម៉ែត្រលេខ ១១៥-១១៦ ស្ថិតក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ។

សេចក្ដីជូនដំណឹង របស់រដ្ឋបាលខេត្តព្រះសីហនុ បានឲ្យដឹងថា មកដល់វេលាព្រឹក ថ្ងៃទី ១៣ ខែកក្កដា ឆ្នាំ ២០២២នេះ កម្រិតជំនន់ទឹកភ្លៀងបានថយចុះជាបណ្ដើរៗ ស្រកផុតពីកំណាត់ផ្លូវជាតិលេខ ៤ ចន្លោះគីឡូម៉ែត្រលេខ ១១៥-១១៦ ស្ថិតក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ដែលបានជន់លិចកាលពីថ្ងៃម្សិលមិញ។

ដូចនេះ រដ្ឋបាលខេត្តព្រះសីហនុ អនុញ្ញាតឲ្យយានយន្ដគ្រប់ប្រភេទចរាចរឆ្លងកាត់កំណាត់ផ្លូវជាតិលេខ ៤ ត្រង់ចំណុចនោះឡើងវិញចាប់ ចាប់ពីពេលជូនដំណឹងនេះតទៅ។ យ៉ាងណាក៏ដោយ រដ្ឋបាលខេត្តព្រះសីហនុ បានអំពាវនាវឲ្យអ្នកបើកបរទាំងអស់ ត្រូវបើកបរឲ្យមានការប្រុងប្រយ័ត្នខ្ពស់ យោគយល់អធ្យាស្រ័យ និងចូលរួមសហការជាមួយអាជ្ញាធរមានសមត្ថកិច្ច ឲ្យបានល្អប្រសើរ៕