ព័ត៌មានជាតិ

លោក ណុប ចាន់ណារិន្ទ ៖ រលកកូវីដ១៩ មិនអាចបង្អាក់ឆន្ទៈបំពេញភារកិច្ចការងាររបស់ក្រសួងឡើយ

បានផុស

៤ years មុន

នៅ

ថ្ងៃពុធ ២៣ ធ្នូ ២០២០

ដោយ

លោក ណុប ចាន់ណារិន្ទ រដ្ឋលេខាធិការ និងជាអ្នកនាំពាក្យ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ( ទ រ ព អ ) បានឲ្យដឹងថា បើទោះបីកម្ពុជាទទួលរងការប៉ះពាល់ដោយសារកូវីដ-១៩ ធ្វើឲ្យយើងមានការលំបាក ក្នុងការបំពេញកិច្ចការ និងតម្រូវឲ្យធ្វើការងារស្ថិតនៅគម្លាតពីគ្នា តាមការណែនាំរបស់ក្រសួងសុខាភិបាលយ៉ាងណាក៏ដោយ ក៏ក្រសួងនៅតែបន្តភារកិច្ចរបស់ខ្លួន មិនឲ្យកកស្ទះការងារនោះឡើយ។ នេះយោងតាមគេហទំព័រ Facebook របស់ លោកណុប ចាន់ណារិន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា តាមរយៈការកំណត់យកភារកិច្ចធំៗ និងតម្រូវការចាំបាច់ ដែលជាសំណូមពររបស់ពលរដ្ឋ ដូចជាកិច្ចការ ទាក់ទងទៅនឹងបណ្តឹងវិវាទផ្សេងៗ ដែលពលរដ្ឋបានដាក់ពាក្យបណ្តឹងវិវាទមកក្រសួង ដើម្បីយកមកដោះស្រាយ។ ជាក់ស្តែង នៅថ្ងៃអង្គារ ទី២២ ខែធ្នូ ឆ្នាំ២០២០ លោកជំទាវកិត្តិសង្គហបណ្ឌិត ម៉ែន សំអន ឧបនាយរដ្ឋមន្ត្រី រដ្ឋមន្ត្រី ក្រសួង ទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានដឹកនាំកិច្ចប្រជុំសម្រុះសម្រួលបញ្ចប់វិវាទ ករណីបណ្តឹងនៅខេត្តមណ្ឌលគិរី តាមរយៈយន្តការ ឈ្នះ ឈ្នះ បានសម្រេចជាស្ថាពរ។ សូមបញ្ជាក់ថា ករណីបណ្តឹងវិវាទនេះ បានកើតឡើង នៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី នឹងបានអូសបន្លាយអស់រយៈជាយូរមកហើយ តែដោយមានការដឹកនាំសម្រុះសម្រួលជាច្រើនដំណាក់កាល និងផ្អែកលើការចុះស្រាវជ្រាវរបស់មន្ត្រីជំនាញ និងដោយមានការចង្អុលបង្ហាញផ្ទាល់របស់លោជំទាវ កិត្តិសង្គហបណ្ឌិត ម៉ែន សំអន ភាគីទាំងសងខាងបានទទួលយកដោយរីករាយ និងបានឈានទៅបញ្ចប់សាច់រឿងនេះ ទាំងស្រុងតែម្តង។

គួររំលឹកថា ក្រសួងក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានបង្កើតកម្មវិធីទទួលពាក្យបណ្តឹង តាមអនឡាញ បន្ថែមលើការងារទទួលបណ្តឹងផ្ញើមកក្រសួងដោយផ្ទាល់ ដើម្បីសម្រាប់ជាជម្រើសងាយស្រួលរបស់ពលរដ្ឋ ធ្វើកាន់តែលឿន និងប្រសិទ្ធិភាព ស្របតាមចក្ខុវិស័យរបស់រាជរដ្ឋាភិបាល កំណត់ថា ជារាជរដ្ឋាភិបាលឌីជីថលតែម្ដង៕

អត្ថបទ៖ វិមាន

Related Topics:ការដោះស្រាយបញ្ហា