សម្ដេចតេជោ ហ៊ុន សែន ជំរុញឲ្យក្រុមហ៊ុនទូរស័ព្ទ និងអ៊ិនធើណេត ពង្រឹងសេវាទៅកាន់តំបន់ទេសចរណ៍

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជំរុញឲ្យក្រុមហ៊ុនទូរស័ព្ទ និងអ៊ិនធើណេតទាំងអស់ ពង្រឹងសេវាទៅកាន់តំបន់ទេសចរណ៍នៅទូទាំងប្រទេស ដើម្បីពង្រីកទេសចរផ្ទៃក្នុង។ ការជំរុញ របស់សម្ដេចតេជោនាយករដ្ឋមន្ត្រី បានធ្វើឡើងក្នុងពិធីបិទសន្និបាតបូកសរុបការងារទេសចរណ៍ ការបូកសរុបផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ នៅព្រឹកថ្ងៃទី ១៤ ខែកក្កដា ឆ្នាំ ២០២២នេះ។   

សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «គ្រប់បណ្ដាក្រុមហ៊ុនទូរស័ព្ទ អ៊ិនធើណេតទាំងអស់ត្រូវពង្រឹងខ្លួន នៅទីក្រុងក៏ត្រូវពង្រឹង ហើយពង្រីកទៅតាមតំបន់ទេសចរណ៍នានា។ ពីព្រោះដើម្បីទាក់ទាញឲ្យអ្នកទេសចរ បានទៅលេងកម្សាន្តនៅតំបន់ដាច់ស្រយាល។ ដូច្នេះចាំបាច់ណាស់ត្រូវតែមានប្រព័ន្ធគាំទ្រផ្នែកអ៊ិនធើណេតនេះ ពីព្រោះគេត្រូវទាក់ទងជាមួយការងារ។ ជួនកាលគេទៅដេកនៅទីនោះ ប៉ុន្តែគេធ្វើការ។ ពីព្រោះសម័យឥឡូវ គេមិនចាំបាច់ធ្វើការជួបមុខគ្នានោះទេ»។

បើតាមសម្តេចតេជោ ហ៊ុន សែន គេជួបគ្នាតាម Video call ឬបានតាមអ្វីក៏បាន ឆ្លងឆ្លើយគ្នា សូម្បីតែចុះហត្ថលេខាក៏គេអាចចុះបានដែរ។ នេះគឺជាចំណុច ដែលសម្តេចផ្ដល់អនុសាសន៍ គិតគូរពង្រឹងបន្ថែមទៀត នូវការលើកកម្ពស់ទេស ចរណ៍ផ្ទៃក្នុង ហើយមិនមែនមានន័យថា ប្រជាជនកម្ពុជា ខ្វះលុយដេក Hotel នោះទេ។ សម្តេចអះអាងថា ប្រជាជនកម្ពុជាបច្ចុប្បន្ន អាចដេកសណ្ឋាគារផ្កាយ ៣ ផ្កាយ ៤ ផ្កាយ ៥ មិនចាំបាច់តែបរទេសទេ។

ជាការកត់សម្គាល់ មួយរយៈចុងក្រោយនេះ ប្រជាពលរដ្ឋមានការរអ៊ូរទាំងយ៉ាងខ្លាំង ពីបញ្ហាសេវាទូរ​ស័ព្ទ ជាពិសេសលើបញ្ហាសេវាអ៊ិនធើណេតនេះ៕

អត្ថបទ៖ កោះកែវ