ផ្ទះពលរដ្ឋ​ជិត ១០០ ខ្នង​ប្របមាត់ស្ទឹងសង្កែរងការជន់លិច

លំនៅដ្ឋានរបស់ប្រជាពលរដ្ឋដែលរស់នៅជាប់នឹងដងស្ទឹងសង្កែត្រូវបានលិចលង់ ជិត១០០ខ្នង បន្ទាប់ពីនៅប៉ែកក្បាលស្ទឹងមានភ្លៀងធ្លាក់ឥតឈប់ឈរ ដែលបង្កឱ្យទឹកស្ទឹងសង្កែស្ទុះឡើងយ៉ាងឆាប់រហ័ស។

ការលិចលង់ផ្ទះជាច្រើនខ្នងតាមបណ្តោយដងស្ទឹងនេះ គឺបានកើតឡើង នៅថ្ងៃទី ១៤ ខែកក្កដា ឆ្នាំ២០២២ ដោយ ស្ថានភាពទឹកជំនន់នៅស្ទឹងសង្កែបានជន់ឡើងបណ្តាលឲ្យលិចផ្ទះប្រជាពលរដ្ឋដែលរស់នៅតាមដងស្ទឹងលើ ២ សង្កាត់ ក្នុងនោះគឺ៖ សង្កាត់ រតនៈ ផ្ទះត្រូវលិចទឹកមានចំនួន ៤២ ខ្នងផ្ទះ ក្នុងនោះ ទឹកលិចខ្លាំង ចំនួន ១២ ខ្នងផ្ទះ និង ទឹកលិចមធ្យម ចំនួន ៣០ ខ្នងផ្ទះ។

សង្កាត់ ក្តុលដូនទាវ ផ្ទះត្រូវលិចទឹកមានចំនួន ៤៧ ខ្នងផ្ទះ ក្នុងនោះ ទឹកលិចខ្លាំង ចំនួន ១៣ ខ្នងផ្ទះ និង ទឹកលិចមធ្យម ចំនួន ៣៤ ខ្នងផ្ទះ។

សរុបរួមមានចំនួន ៨៩ ខ្នងផ្ទះ ដែលបច្ចុប្បន្ននេះរបាយការណ៍បានរាយការណ៍ទៅអាជ្ញាធរខេត្តរួចហើយ ប៉ុន្តែប្រសិនបើទឹកភ្លៀងនៅតែបន្តធ្លាក់នៅក្នុងស្រុកសំឡូត និងនៅក្នុងតំបន់ជួរភ្នំក្បាលឡាន ដែលជាប្រភពក្បាលស្ទឹង នោះអាចប្រឈមនឹងការជន់ជោរបន្ថែមទៀត៕

អត្ថបទៈ សោ និយមរ័ត្ន