ព័ត៌មានជាតិ

កាយដីដំបូកប្រទះឃើញគ្រាប់មិនទាន់ផ្ទុះ ៨ គ្រាប់ យកប្រគល់ឲ្យស៊ីម៉ាក់

បានផុស

៣ years មុន

នៅ

ថ្ងៃចន្ទ ១៨ កក្កដា ២០២២

ដោយ

បាត់ដំបង ៖ យុទ្ធភ័ណ្ឌមិនទាន់ផ្ទុះចំនួន៨គ្រាប់ ដែលក្នុងនោះមានទាំងគ្រាប់ផ្លោង និងគ្រាប់មីនផងនោះ ត្រូវបានប្រជាពលរដ្ឋប្រគល់អោយសមត្ថកិច្ច បន្ទាប់ពីពួកគាត់បានប្រទះឃើញក្នុងដីដំបូក។

ហេតុការណ៍នេះកើតឡើង នាព្រឹក ថ្ងៃទី ១៨ ខែកក្កដា ឆ្នាំ២០២២ ដោយប្រជាពលរដ្ឋ ឈ្មោះ សឿន សាន ភេទប្រុស អាយុ ៥៣ឆ្នាំ នៅ ភូមិបួរសង្គ្រាច ឃុំឃ្លាំងមាស ស្រុកបវេល ខេត្តបាត់ដំបង បាននាំយកគ្រាប់មិនទាន់ផ្ទុះមកប្រគល់អោយសមត្ថកិច្ច ដើម្បីរក្សាទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការរៀបរាប់ពីប្រជាពលរដ្ឋរូបនោះបាននិយាយថា ព្រឹកនោះគាត់បានទៅភ្ជួរស្រែ ហើយគាត់ក៏បានកាប់ដីដំបូកជុំវិញដើម្បីពង្រីកផ្ទៃដី ហើយក៏បានប្រទះឃើញគ្រាប់ទាំងនេះនៅរួមគ្នាតែមួយរណ្តៅ ទើបគាត់ប្រមូលយកមកប្រគល់ឲ្យសមត្ថកិច្ចតែម្តង។

ក្រោយពីសមត្ថកិច្ចត្រួតពិនិត្យរួចមកគឺសង្កេតឃើញថា គ្រាប់ទាំងអស់គឺមានដូចជា គ្រាប់ បេ ៤០ ចំនួន ១ គ្រាប់ គ្រាប់បេ៤១ចំនួន២គ្រាប់ គ្រាប់ឡង់ចំនួន១គ្រាប់ គ្រាប់ផ្លោងធុន៦០មីល្លីម៉ែត្រ ចំនួន ១គ្រាប់ គ្រាប់ផ្លោងធុន៨០មីល្លីម៉ែត្រចំនួន២គ្រាប់ និងគ្រាប់មីន៦៩ចំនួន១គ្រាប់។ បច្ចុប្បន្នគ្រាប់ទាំងនេះ ត្រូវបានកម្លាំងសមត្ថកិច្ច ប្រគល់ឲ្យស៊ីម៉ាក់យកទៅកម្ទេចចោល៕

អត្ថបទ ៖ សោ និយមរ័ត្ន