ព័ត៌មានជាតិ
ច្បាស់ហើយ ក្រសួងអប់រំ នឹងបើកដំណើរការសាលារៀនឡើងវិញដំណាក់កាលទី៣ ក្នុងខែវិច្ឆិកា
អ្នកនាំពាក្យក្រសួងអប់រំ យុវជន និងកីឡា បានឲ្យដឹងថា ក្រសួង នឹងបើកដំណើរការសាលារៀនឡើងវិញ ដំណាក់កាលទី៣ នៅសប្ដាហ៍ទី១ ក្នុងខែវិច្ឆិកា ឆ្នាំ២០២០ ខាងមុខនេះ។
លោក រស់ សុវាចា អ្នកនាំពាក្យ ក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី២៧តុលានេះថា «ក្រសួងអប់រំ បានទទួលគោលការណ៍ដ៏ខ្ពង់ខ្ពស់ពី សម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ដើម្បីបើកសាលារៀនឡើងវិញនៅដំណាក់កាលទី៣ ក្នុងសប្ដាហ៍ទី១ ខែវិច្ឆិកាខាងមុខនេះ»។
យ៉ាងណាក៏ដោយ លោកមិនបានបញ្ជាក់ថា ការបើកសាលានៅដំណាក់កាលទី៣នេះ បើកទូទាំងប្រទេស ឬយ៉ាងណានោះទេ ដោយរង់ចាំការចេញសេចក្ដីជូនដំណឹងជាផ្លូវការរបស់ក្រសួង។
លោកបានបន្តថា នៅពេលឆាប់ៗនេះ ក្រសួងអប់រំ នឹងចេញសេចក្ដីណែនាំ ស្ដីពីការបើកដំណើរការសាលារៀនដំណាក់ទី៣ ដល់គ្រឹះស្ថានសិក្សាពាក់ព័ន្ធ ដើម្បីអនុវត្តប្រកបដោយប្រសិទ្ធភាព។
ពាក់ព័ន្ធនឹងការបើកសាលារៀនឡើងវិញនេះដែរ លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍នៅក្នុងកិច្ចពិភាក្សា ស្ដីពីការបើកដំណើរការសាលារៀនឡើងវិញកាលពីបេលថ្មីៗនេះថា ការបើកសាលាជាដំណាក់កាលៗនេះ គឺក្រសួងតែងតែគិតគូរពីសុខសុវត្ថិភាពនិងសុខភាពរបស់សិស្ស និងបុគ្គលិកអប់រំ។ ក្នុងនោះ ដើម្បីធ្វើយ៉ាងណាកុំឲ្យមានឆ្លងជំងឺកូវីដ-១៩ និងអាចឲ្យសិស្សបន្តការរៀនសូត្របានជាធម្មតា។
លោករដ្ឋមន្ត្រី បានបន្តទៀតថា ក្រសួង មិនយកបុគ្គលិកអប់រំ និងសិស្ស មកប្រថុយប្រថាននោះទេ។ក្រសួង គិតពីសុវត្ថិភាពជាចម្បង ពោលគឺមុននឹងបើក គឺចុះវាយតម្លៃពីស្ថានការណ៍ជាមុនសិនទើបអាចបើកបាន។
លោករដ្ឋមន្ត្រីបានបញ្ជាក់ថា «យើងសុខចិត្តបើកសាលាយឺត ប្រសើរជាងបើកលឿនដូចជាបណ្តាប្រទេសមួយចំនួន បើកហើយបិទទៅវិញដោយសារឆ្លងជំងឺនេះនៅក្នុងសាលារៀន។ ចំណែកយើងនៅមិនទាន់មានសិស្ស ឬបុគ្គលិកអប់រំយើងណាម្នាក់ឈឺដោយសារជំងឺកូវីដ-១៩នេះនៅឡើយទេ»។
គួរបញ្ជាក់ថា ក្រសួងអប់រំ បានបើកសាលាឡើងវិញនៅដំណាក់កាលទី១ នាខែសីហា និងដំណាក់កាលទី២ បើកនៅថ្ងៃទី៧ ខែកញ្ញា ឆ្នាំ២០២០ ដោយអនុញ្ញាតឲ្យសិស្សថ្នាក់ទី៩ និងថ្នាក់ទី១២ នៅទូទាំងប្រទេស និងទីរួមខេត្តចំនួន៤រួមមាន ៖ ទីរួមខេត្តក្រចេះ ស្ទឹងត្រែង រតនគីរី និងមណ្ឌលគីរីអនុញ្ញាតឲ្យសិស្សគ្រប់កម្រិតចូលរៀនឡើងវិញ ដោយសារតែខេត្តទាំង៤ មានហានិភ័យឆ្លងជំងឺកូវីដ-១៩ ក្នុងកម្រិតទាប ព្រមទាំងគ្រឹះស្ថានសិក្សាឯកជនគ្រប់កម្រិត។
ក្រៅពីនេះ ក្រសួង បាននិងបន្តពិនិត្យលទ្ធភាពជាក់ស្ដែងបើកដំណើរការគ្រឹះស្ថានសិក្សាសាធារណៈតាមរាជធានី-ខេត្តផ្សេងទៀតតាមទ្រង់ទ្រាយតូច និងឆ្លាស់វេនគ្នាផងដែរ៕
អត្ថបទ ៖ សំអឿន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៧ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង