លោកអភិបាល​ខណ្ឌច្បារ​អំពៅបញ្ជាឲ្យចាប់​គោដែល​ដើរ​ប្រសាច​លើផ្លូវ​ជាតិលេខ១

សត្វគោជាច្រើនក្បាល​ត្រូវបានកម្លាំងប្រជាការពារសាលាខណ្ឌច្បារ​អំពៅចាប់ទុកមួយ​កន្លែង​បន្ទាប់​ពីសត្វគោទាំងនេះដើរប្រសេចប្រសាចពេញផ្លូវជាតិលេខ១ក្នុងមូលដ្ឋានខណ្ឌច្បារអំពៅរាជធានីភ្នំពេញ។

​តាមប្រភពពីលោក គ្រី ហុច ​មន្ត្រីប្រចាំការសាលាខណ្ឌច្បារអំពៅបានឲ្យដឹងថា​ នៅព្រឹកថ្ងៃទី២២​ខែ​កក្កដានេះមានសត្វ​គោប្រមាណជាង ១០ក្បាលបានដើរប្រសេចប្រសាចពេញលើផ្លូវជាតិលេខ១ក្នុងមូលដ្ឋានសង្កាត់វាលស្បូវនឹងសង្កាត់ព្រែកឯងខណ្ឌច្បារអំពៅរាជធានីភ្នំពេញដោយពុំមានម្ចាស់មកឃ្វាលឡើយ។

លោក ចេង មុនីរ៉ា អភិបាលនៃគណអភិបាលខណ្ឌ​ច្បារអំពៅបានបញ្ជារឲ្យកម្លាំង​ប្រជាការពារ​ចាប់​ប្រមូលទុកនៅបរិវេណសាលាសង្កាត់ព្រែកឯងស្ថិតនៅតាមបណ្តោយផ្លូវជាតិលេខ១ដើម្បីកុំប៉ះពាល់ដល់អ្នកដំណើព្រោះកន្លងមកករណីគ្រោះថ្នាក់ចរាចរណ៍ជាច្រើនផ្តើមចេញការសត្វគោដែលម្ចាស់គោ ប្រលែងឲ្យដើរស៊ីស្មៅពាសវាលពាសកាលបែបនេះ។

ក្នុងនោះអាជ្ញាធរបានផ្សព្វផ្សាយដល់ម្ចាស់គោបើដឹងថាបាត់គោជាង១០ក្បាលនេះគឺរួសរាន់មកយកគោទៅវិញហើយមុននឹងយកគោទៅវិញត្រូវធ្វើកិច្ចសន្យាជាលាយលក្ខ័អក្សរដោយបញ្ឈប់ពន្លែង​គោរបស់ខ្លួនឲ្យដើរស៊ីស្មៅពាសវាលពាសកាលបែបនេះ៕

អត្ថបទ៖ នរា