ជប៉ុន សន្យាស្ដារស្ទឹងតូច និងទ្វារទឹក ៧មករា ជួយវិស័យកសិកម្ម និងការពារទឹកជំនន់

លោក Miyasaki Masao តំណាងរាស្រ្តជប៉ុន និងជាអនុរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទជប៉ុន បានសន្យាថា នឹងជួយស្ដារស្ទឹងតូច និងទ្វារទឹក ៧មករា សម្រាប់បម្រើឱ្យវិស័យកសិកម្ម និងការពារពីទឹកជំនន់។

ការលើកឡើងរបស់លោកអនុរដ្ឋមន្ត្រីកសិកម្មជប៉ុននេះ បានធ្វើឡើងក្នុងឱកាសលោក អញ្ជើញចុះពិនិត្យគម្រោង​ស្ដារស្ទឹងតូច និងទ្វារទឹក ៧ មករា ព្រមទាំងទីលានចាក់សំរាមនៅស្រុកកណ្ដាលស្ទឹង កាលពីពេលថ្មីៗនេះ ដោយមានការចូលរួមពីលោក តាំង ម៉េងលាន  អភិបាលរងខេត្តកណ្តាល និងលោក ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម ។

ក្នុងការចុះពិនិត្យនេះ លោក Miyasaki Masao បានមានប្រសាសន៍ថា ជប៉ុន នឹងពង្រឹងចំណងមិត្តភាព កិច្ចសហប្រតិបត្តិការ និងខិតខំប្រឹងប្រែងជួយមិត្តកម្ពុជា ក្នុងវិស័យកសិកម្ម រួមទាំងការកសាងហេដ្ឋារចនាសម្ព័ន្ធ ប្រព័ន្ធធារាស្ត្រ ដើម្បីជួយលើកកម្ពស់កម្រិតជីវភាពប្រជាពលរដ្ឋកម្ពុជា។

គម្រោងស្ដារស្ទឹងតូច និងទ្វារទឹក ៧មករា គឺមានគោលបំណង ដើម្បីបម្រើឱ្យវិស័យកសិកម្ម និងការពារពីទឹកជំនន់ ហើយគម្រោងនេះនឹងចាប់ផ្ដើមនៅពេលឆាប់ៗខាងមុខ ដែលមានការសិក្សាគម្រោងដោយអង្គការ JICA។

លោក តាំង ម៉េងលាន  បានថ្លែងអំណរគុណ ចំពោះរដ្ឋាភិបាល និងប្រជាជនជប៉ុន តាមរយៈ ទីភ្នាក់ងារអភិវឌ្ឍន៍​របស់ជប៉ុន (JICA) ដែលបានសិក្សាយ៉ាងច្បាស់លាស់ លើការការពារទឹកជំនន់ និងការកែលម្អប្រព័ន្ធ ប្រឡាយលូ ននៅក្នុងភូមិសាស្ត្រខេត្តកណ្តាល៕ សំអឿន