ព័ត៌មានជាតិ

ស្វែងយល់ពីនីតិវិធីវិសោធនកម្មរដ្ឋធម្មនុញ្ញកម្ពុជា

បានផុស

២ years មុន

នៅ

ថ្ងៃចន្ទ ២៥ កក្កដា ២០២២

ដោយ

រដ្ឋសភាកម្ពុជា នឹងបើកកិច្ចប្រជុំពេញអង្គ ដើម្បីពិភាក្សា និងអនុម័តសេចក្ដីព្រាងច្បាប់ស្ដីពី វិសោធនកម្មមាត្រាមួយចំនួននៃរដ្ឋធម្មនុញ្ញ និងច្បាប់ធម្មនុញ្ញបន្ថែមនៅថ្ងៃទី ២៨ កក្កដា ខាងមុខនេះ។ អំណាចធ្វើការកែប្រែ ឬវិសោធនកម្មរដ្ឋធម្មនុញ្ញនេះ ជាអំណាចរដ្ឋធម្មនុញ្ញប្រទាន ហើយអំណាចនេះ ត្រូវបានចែងនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តើស្ថាប័នណាខ្លះដែលអាចស្មើធ្វើវិសោធនកម្មរដ្ឋធម្មនុញ្ញបាន?

ស្ថាប័នដែលអាចស្នើធ្វើវិសោធនកម្មបាន គឺមានអង្គព្រះមហាក្សត្រ នាយករដ្ឋមន្ត្រី និងប្រធានរដ្ឋសភា តាមសេចក្ដីស្នើរបស់តំណាងរាស្ត្រ ១/៤។

តើការកែប្រែ ឬធ្វើវិសោធនកម្មរដ្ឋធម្មនុញ្ញនេះ ធ្វើឡើងតាមរបៀបណា?

តាមរដ្ឋធម្មនុញ្ញនៃព្រះរាជាណាចក្រកម្ពុជា អង្គការដែលមានសមត្ថកិច្ចធ្វើវិសោធនកម្មរដ្ឋធម្មនុញ្ញ គឺរដ្ឋសភា។ ព្រះមហាក្សត្រ ពេលទទួលសំណើហើយ ទើបពិគ្រោះមតិជាមួយក្រុមប្រឹក្សាធម្មនុញ្ញ។ ក្រុមប្រឹក្សាធម្មនុញ្ញថ្វាយមតិទៅព្រះមហាក្សត្រ បើធ្វើបានព្រះមហាក្សត្រទ្រង់ផ្តល់ចម្លើយទៅនាយករដ្ឋមន្ត្រី ឬ ប្រធានរដ្ឋសភា ហើយអនុវត្តនីតិវិធីព្រាងច្បាប់ធម្មនុញ្ញ ធ្វើសេចក្ដីថ្លែងហេតុ និងធ្វើសំណើ។

ការកែប្រែ ឬធ្វើវិសោធនកម្មរដ្ឋធម្មនុញ្ញ ត្រូវធ្វើឡើងដោយច្បាប់ធម្មនុញ្ញមួយ(ចំណុចធម្មនុញ្ញដែលនឹងត្រូវសើរើ ឬធ្វើវិសោធនកម្មថ្មី) ដែលបានអនុម័តដោយរដ្ឋសភាតាមមតិភាគច្រើន ពីរភាគបី(២/៣) នៃចំនួនសមាជិកសភាទាំងមូល។ ព្រឹទ្ធសភា ត្រូវត្រួតពិនិត្យ និងអនុម័តដោយសំឡេងពីភាគបី (២/៣) នៃចំនួនសមាជិកព្រឹទ្ធសភាទាំងមូលដែរ។ បន្ទាប់ពីសភាទាំងពីរអនុម័តយល់ព្រមរួចរាល់ហើយ ព្រះមហាក្សត្រទ្រង់ឡាយព្រះហស្តលេខារួចប្រកាសឲ្យប្រើ។

តើមានចំណុចណាខ្លះដែលត្រូវបានហាមឃាត់មិនឱ្យធ្វើវិសោធនកម្ម?

ការសើរើ ឬធ្វើវិសោធនកម្មរដ្ឋធម្មនុញ្ញ ត្រូវបានហាមឃាត់នៅពេលដែលប្រទេសជាតិស្ថិតក្នុងស្ថានភាពអាសន្ន ឧទាហរណ៍ ដូចជា ពេលមានសង្គ្រាមជាដើម។ ចំពោះការសើរើ ឬធ្វើវិសោធនកម្មដែលប៉ះពាល់ដល់ប្រព័ន្ធប្រជាធិបតេយ្យសេរីពហុបក្ស និងរបបរាជានិយមអាស្រ័យដោយរដ្ឋធម្មនុញ្ញ ក៏ត្រូវបានហាមឃាត់មិនឱ្យធ្វើវិសោធនកម្មផងដែរ។ បន្ថែមពីនេះ នៅក្នុងមាត្រា ៧ វាក្យខ័ណ្ឌទី១ នៃរដ្ឋធម្មនុញ្ញបានចែងថា “ប្រការដែលព្រះមហាក្សត្រទ្រង់គ្រងរាជសម្បត្តិ ប៉ុន្តែមិនកាន់អំណាចឡើយ” គឺមិនអាចសុំកែប្រែបានជាដាច់ខាត៕

ដោយ៖ សេម វាសនា