នាវាកងទ័ពជើងទឹក​ប៉ាគីស្ថាន ១ គ្រឿង ចូលចតកំពង់ផែស្វយ័តក្រុងព្រះសីហនុ 

នាវាកងទ័ពជើងទឹក​ប៉ាគីស្ថានចំនួន​ ១ គ្រឿង មានឈ្មោះ PNS TAIMUR Warship (F-262)​ នៅព្រឹកថ្ងៃទី ២៥ ខែកក្កដា ឆ្នាំ ២០២២ នេះ បានចូលចត​នៅ​កំពង់​ផែ​ស្វយ័ត​ក្រុងព្រះសីហនុ ប្រកបដោយសុវត្ថិភាព ក្នុងគោលបំណងធ្វើទស្សនកិច្ចនៅព្រះរាជាណាចក្រកម្ពុជារយៈពេល​ ៤ ថ្ងៃ​ គឺចាប់ពីថ្ងៃទី ២៥ ដល់ថ្ងៃទី ២៨ ខែកក្កដា ឆ្នាំ២០២២។ 

នៅក្នុងដំណើរចូលចតនៅកំពង់ផែស្វយ័តក្រុងព្រះសីហនុនេះ មានការទទួលស្វាគមន៍ពីនាយ នាយរងកងទ័ពជើងទឹកមូលដ្ឋានសមុទ្រ ដឹកនាំដោយលោកឧត្តមនាវីត្រី អ៊ិន សុខេមរ៉ា នាយសេនាធិការរងមូលដ្ឋានសមុទ្រ។

នាវាកងទ័ពជើងទឹក​ប្រទេសប៉ាគីស្ថាននេះ មានបណ្តោយ ១៣៤.ម៉ែត្រ ទទឹង ១៦ ម៉ែត្រ ជំរៅទឹក ៧ ម៉ែត្រ ទម្ងន់ផ្ទុក ៤ ០៤៦ តោន មាននាយនាវី​ចំនួន ១៦ នាក់ និងពលនាវិក​ចំនួន ១៥៣ នាក់ សរុប​ចំនួន ១៦៩ នាក់​ ដឹកនាំដោយលោកមេបញ្ជាការ​នាវា លោកវរនាវីឯក Muhammad Yarsir Tahir ។ 

គណៈប្រតិភូកងទ័ពជើងទឹកប្រទេសប៉ាគិស្ថាន ចូលជួបសម្ដែងការគួរសមជាមួយមេបញ្ជាការមូលដ្ឋានសមុទ្រ មានកម្មវិធីប្រកួតកីឡាបាល់ទាត់ បាល់ទះ មិត្តភាពរវាងនាយទាហានកង ទ័ពជើងទឹក នៃប្រទេសទាំងពីរ និងដំណើរកម្សាន្តទស្សនារបស់នាវឹកនៅ កន្លែងប្រវត្តិសាស្រ្ត និងឧស្សាហកម្ម បច្ចេកវិទ្យាជាទំនើបផងដែរ៕ 

អត្ថបទ៖ ស៊ុយ ចាន់ធា