ព័ត៌មានជាតិ

អ្នកសារព័ត៌មានជាតិ-អន្តរជាតិជាង ៥០០នាក់ បានចុះឈ្មោះយកព័ត៌មាន ក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី ៥៥ នេះ

បានផុស

៣ years មុន

នៅ

ថ្ងៃអង្គារ ២៦ កក្កដា ២០២២

ដោយ

មន្ត្រីជាន់ខ្ពស់ក្រសួងព័ត៌មាន បានឲ្យដឹងថា គិតត្រឹមថ្ងៃទី ២៥ ខែកក្កដា ឆ្នាំ ២០២២ មានអ្នកសារព័ត៌មានជាតិ-អន្តរជាតិ បានចុះឈ្មោះចូលរួមយកព័ត៌មាន ក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធជាង ៥០០នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផុស សុវណ្ណ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មាន មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ២៦ ខែកក្កដានេះថា មានអ្នកសារព័ត៌មានចំនួន ៥៣៩នាក់ ដោយក្នុងនោះជនបរទេសចំនួន ២៤៧នាក់ បានចុះឈ្មោះមកអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន ដើម្បីចូលរួមយកព័ត៌មាន ក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធ ដែលចាប់ផ្ដើមពីចុងខែកក្កដានេះ។

លោក ផុស សុវណ្ណ បានឲ្យដឹងបន្តថា សម្រាប់អគ្គនាយកដ្ឋានព័ត៌មាន និងសោតទស្សន៍ បានត្រៀមមន្ត្រី និងបុគ្គលិកចំនួន ៧០រូប ដើម្បីជួយសម្របសម្រួលដល់អ្នកសារព័ត៌មាននៅក្នុងកិច្ចប្រជុំនេះ ហើយក៏មានការរៀបចំជាមណ្ឌលព័ត៌មានមួយ សម្រាប់អ្នកសារព័ត៌មានផងដែរ។

លោកបន្ថែមទៀតថា «ដោយសារអ្នកសារព័ត៌មាន មានចំនួនច្រើន អញ្ចឹងយើងក៏ត្រៀមបម្រុងសម្រាប់មណ្ឌលព័ត៌មានមួយ ដែលនៅទីនោះអាចអ្នកសារព័ត៌មានអាចធ្វើការ អាចយកព័ត៌មានបាន នៅមណ្ឌលហ្នឹងផ្ទាល់តែម្ដង ពីព្រោះយើងមិនអាចចូលទៅយកព័ត៌មាន នៅក្នុងកិច្ចប្រជុំទាំងអស់តែម្ដងទេ កិច្ចប្រជុំមួយចំនួនកន្លែងខ្លះ ទីតាំងវាចង្អៀត យើងឲ្យតែប៉ុន្មានទេ ចំនួនកំណត់»។

មន្ត្រីជាន់ខ្ពស់ក្រសួងព័ត៌មាន បានបញ្ជាក់ទៀតថា មណ្ឌលព័ត៌មាននេះ ក៏នឹងត្រៀមចែកចាយជូននូវរូបភាព និងវីដេអូមួយចំនួនដល់អ្នកសារព័ត៌មាន ហើយក៏អាចដោនឡូតយកនៅអគ្គនាយកដ្ឋានព័ត៌មាន និងសោតទស្សន៍ ផងដែរ។

សូមជម្រាបថា កិច្ចប្រជុំរដ្ឋមន្រ្តីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធផ្សេងទៀតដែលកម្ពុជាធ្វើជាម្ចាស់ផ្ទះ នឹងប្រព្រឹត្តទៅដោយផ្ទាល់ចាប់ពីថ្ងៃទី ៣១ ខែកក្កដា ដល់ថ្ងៃទី៦ ខែសីហា ឆ្នាំ២០២២ នៅសណ្ឋាគារសុខា រាជធានីភ្នំពេញ។ លោកឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេសកម្ពុជា បានឲ្យទីភ្នាក់ងារសារព័ត៌មានកម្ពុជា AKP ដឹងកាលពីសប្តាហ៍មុនថា កិច្ចប្រជុំរដ្ឋមន្រ្តីការបរទេសអាស៊ានលើកទី ៥៥នេះ មិនមែនមានតែប្រតិភូនៅក្នុងអាស៊ាននោះទេ ពោលគឺមានប្រតិភូមកចូលរួមដោយផ្ទាល់រហូតដល់ទៅ ៣៩ប្រទេសឯណោះ។ ក្នុងនោះ ២៧ប្រទេស ជាការមកចូលរួមទូទៅ និង ១២ប្រទេសផ្សេងទៀត ជាភ្ញៀវរបស់ប្រធានអាស៊ាន៕

អត្ថបទ៖ ឃួន សុភ័ក្រ