កម្ពុជា អនុម័តគម្រោងវិនិយោគរបស់សិង្ហបុរីជិត ១៣០គម្រោង ទំហំថវិកាជាង ១ពាន់លានដុល្លារ

គិតត្រឹមខែ មិថុនា ឆ្នាំ ២០២២ គម្រោងវិនិយោគរបស់សិង្ហបុរី ដែលបានអនុម័តដោយក្រុមប្រឹក្សាអភិវឌ្ឍន៍កម្ពុជា និងកំពុងមានប្រតិបត្តិការនៅកម្ពុជា មានចំនួន ១២៧គម្រោង ក្នុងនោះ មានវិស័យទេសចរណ៍ កម្មន្តសាល ហេដ្ឋារចនាសម្ព័ន្ធ និងវិស័យផ្សេងៗទៀត ក្នុងទឹកប្រាក់ប្រមាណជាង ១ពាន់លានដុល្លារ។

លោកស្រី តែវ ឡាយឆេង ឯកអគ្គរដ្ឋទូតសិង្ហបុរីប្រចាំកម្ពុជា បានលើកឡើងថា សង្ហបុរីស្ថិតក្នុងចំណោម​វិនិយោគិន​បរទេសធំជាងគេទី៥របស់កម្ពុជា។ លោកស្រីបន្តថា ការវិនិយោគរបស់សិង្ហបុរីនៅកម្ពុជា គ្របដណ្តប់លើវិស័យ​អចលនទ្រព្យ ថាមពល ពាណិជ្ជកម្ម និងចែកចាយ ម្ហូបអាហារ ការអប់រំ និងហិរញ្ញវត្ថុ ជាដើម។ លោកស្រី បានគូសបញ្ជាក់ទៀតថា កម្ពុជា គឺជាប្រទេសមួយ ដែលមានកំណើនសេដ្ឋកិច្ចលឿនជាងគេនៅអាស៊ី។ កម្ពុជា បានងើបចេញពីជំងឺរាតត្បាតកូវីដ-១៩ បន្ទាប់ពីបានសម្រេចជោគជ័យនូវយុទ្ធនាការចាក់វ៉ាក់សាំង ហើយត្រូវបានរំពឹងថា នឹងមានកំណើនសេដ្ឋកិច្ចកម្រិតខ្ពស់ដូចមុន។

ទន្ទឹមនេះ លោក សុខ ខឿន ឯកអគ្គរាជទូតកម្ពុជាប្រចាំសិង្ហបុរី បានឱ្យដឹងថា យុទ្ធសាស្រ្តការទូតសេដ្ឋកិច្ច ឆ្នាំ ២០២១-២០២៣ ដែលបានដាក់ចេញនៅដើមឆ្នាំ ២០២១ មានគោលបំណងជំរុញពាណិជ្ជកម្ម វិនិយោគ ទេសចរណ៍ និងវប្បធម៌ ដើម្បីចូលរួមចំណែកអភិវឌ្ឍន៍សេដ្ឋកិច្ចជាតិ និងលើកកម្ពុជានៅក្នុងឆាកតំបន់ និងអន្តរជាតិ។

លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា បរិស្ថានវិនិយោគនៅកម្ពុជា ដែលមានអំណោយផល គឺជាមូលដ្ឋានគ្រឹះដ៏រឹងមាំសម្រាប់រង់ចាំ​ទទួលការវិនិយោគរបស់​សិង្ហបុរី ដើម្បីច្បាមយកនូវកាលានុវត្តភាពដ៏លើសលុបក្នុងវិស័យកសិ-ចំណីអាហារ សេវាកម្ម និងកម្មន្តសាល។ លោក ក៏បានអំពាវនាវឱ្យមានការវិនិយោគកាន់តែច្រើនថែមទៀត ពីវិនិយោគិនសក្កានុពលសិង្ហបុរី ដែលនឹងរួមចំណែកដល់​ការស្តារឡើងវិញ និងអភិវឌ្ឍន៍សេដ្ឋកិច្ចកម្ពុជា បានយ៉ាងឆាប់រហ័ស។

ក្រៅពីការវិនិយោគលើគម្រោងនានា ប្រទេសទាំងពីរមានការតភ្ជាប់ជើងហោះហើរចំនួន ៣៥ជើង ក្នុងមួសប្តាហ៍ផងដែរ។ នេះជាការបន្ថែមរបស់លោកស្រី តែវ ឡាយឆេង ឯកអគ្គរដ្ឋទូតសិង្ហបុរីប្រចាំកម្ពុជា៕