មកស្តាប់ការបកស្រាយរបស់ស្ថាប័នជំនាញ ជុំវិញការធានារ៉ាប់រងយានយន្តជាកាតព្វកិច្ច

ថ្មីៗនេះ រាជរដ្ឋាភិបាលកម្ពុជា បានបង្ហើបពីការដាក់ឱ្យប្រើប្រាស់នូវធានារ៉ាប់រងយានយន្តឯកជនជាកាតព្វកិច្ច ដែលជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គមជាតិ តាមរយៈ​ការធានារ៉ាប់រងដល់ជនរងគ្រោះ ដែលបង្កដោយគ្រោះថ្នាក់ចរាចរណ៍នៅតាមដងផ្លូវក្នុងប្រទេសកម្ពុជា។ នេះជាការលើកឡើងរបស់លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធាន​ក្រុមប្រឹក្សាអាជ្ញាធរសេវាហិរញ្ញវត្ថុ មិនមែនធនាគារនៅក្នុង«ទិវាធានារ៉ាប់រង» នៅថ្ងៃទី២៥ ខែកក្កដា។

គម្រោងនេះ អាចនឹងដំណើរការក្នុងឆ្នាំ២០២២ បន្ទាប់ពីទីផ្សារធានារ៉ាប់រងរបស់កម្ពុជា បាននិងកំពុងបន្តរីកចម្រើន​យ៉ាងឆាប់ ក្នុងរយៈពេល៥ឆ្នាំចុងក្រោយនេះ។

ក្រោយមានការផ្សព្វផ្សាយព័ត៌មាននេះ អ្នកលេងបណ្តាញសង្គម Facebook បានបញ្ចេញមតិផ្សេងៗគ្នា ដោយមិនបានយល់ច្បាស់អំពីអត្ថន័យនៃការអនុវត្តនេះ។

អ្នកលេង Facebook ឈ្មោះ San seksokhom បានបញ្ចេញមតិថា « ហេតុអ្វីត្រូវកំណត់ ឲ្យប្រជាពលរដ្ឋ? ហេតុអ្វីប្រើពាក្យថាកាតព្វកិច្ច? ឬក៏ក្រុមហ៊ុនធានារ៉ាប់រង មានជាប់ពាក់ព័ន្ធអ្វីជាមួយរដ្ឋឬ? ឬរដ្ឋទំនេរខ្លាំងដល់​ថ្នាក់ជួយធ្វើទីផ្សារឲ្យក្រុមហ៊ុនធានារ៉ាប់រង? ឬក៏រដ្ឋបានភាគលាភពីក្រុមហ៊ុនធានារ៉ាប់រង គួរសមមែនទេ បានជាប្រឹងយ៉ាងនេះ?»

អ្នកលេង Facebook ដដែលបានបន្តថា«​ ពន្ធផ្លូវបង់ជាប្រចាំ សាំងថ្លៃ ប្រាក់ខែមិនសូវបានច្រើន ចំណាយគ្រប់មុខ លុយកូនរៀន ថ្លៃទឹក ថ្លៃភ្លើង ថ្លៃកាតទូស័ព្ទ ថ្លៃអ៊ិនធើណេត ថ្លៃហូបចុកប្រចាំថ្ងៃ ថ្លៃចំណាយផ្សេងៗ (មិនរួមដល់អ្នក​នៅផ្ទះជួលផង) សួរថា រស់យ៉ាងម៉េច?»

ក្រោយពីមានការបញ្ចេញមតិស្រដៀងៗគ្នាបែបនេះជាច្រើន និយ័តករធានារ៉ាប់រងកម្ពុជា បានចេញលិខិតតបតាម​សំណួររបស់សារព័ត៌​មានកម្ពុជាថ្មី នៅល្ងាចថ្ងៃទី ២៧ ខែ កក្កដា ឆ្លើយតបដូច្នេះថា ការធានារ៉ាប់រងយានយន្ត​ជាកាតព្វកិច្ច គឺជាគោលនយោបាយគាំពារសុវត្ថិភាពហិរញ្ញវត្ថុក្នុងសង្គម សម្រាប់បុគ្គលម្នាក់ៗ ដែលពាក់ព័ន្ធនឹង​ការធ្វើចរាចរណ៍នៅលើដងផ្លូវសាធារណៈ និងត្រូវបានដាក់ឱ្យអនុវត្តស្ទើរគ្រប់ប្រទេសលើសកលលោក។

និយ័តករធានារ៉ាប់រងកម្ពុជា បានឱ្យដឹងទៀតថា អ្នកប្រើប្រាស់យានយន្តទាំងអស់ សុទ្ធតែមានភារៈទទួលខុស​ត្រូវរៀងខ្លួន ចំពោះអ្នកដំណើរនៅលើដងផ្លូវសាធារណៈ នៅពេលមានគ្រោះថ្នាក់ចរាចរណ៍កើតឡើង ពាក់ព័ន្ធនឹង​ការបញ្ជាយានយន្តរបស់ខ្លួន។ ធានារ៉ាប់រងយានយន្តនឹងផ្តល់ជូនម្ចាស់យានយន្តនូវការទទួលខុសត្រូវលើការទូទាត់សំណងជូនជនរងគ្រោះ។ ប៉ុន្តែករណីម្ចាស់យានយន្តមិនមានការធានារ៉ាប់រងនោះ រាល់ការចំណាយ ឬការខូចខាតនឹងត្រូវប្រើប្រាស់ប្រាក់​សន្សំរបស់ខ្លួន ថែមទាំងឈានដល់ការខ្ចីលុយគេថែមទៀត ដែលធ្វើឱ្យបន្ទុកសេដ្ឋកិច្ចគ្រួសារកាន់តែធ្ងន់ធ្ងរ។

លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានលើកឡើងថា ទីផ្សារធានារ៉ាប់រងនៅកម្ពុជា ក្នុងពេលបច្ចុប្បន្ន មានក្រុមហ៊ុនធានារ៉ាប់រងសរុប៣៩ ក្នុងនោះ ក្រុមហ៊ុនធានារ៉ាប់រងទូទៅមានចំនួន១៨ ក្រុមហ៊ុនធានារ៉ាប់រង​អាយុជីវិត​ចំនួន១៤ និងក្រុមហ៊ុនធានារ៉ាប់រងខ្នាតតូចចំនួន៧ ព្រមទាំងមានក្រុមហ៊ុនធានារ៉ាប់រងបន្តចំនួន១។

យោងតាមមាត្រា៣៣ ជំពូកទី៤ ស្តីពីប្រភេទធានារ៉ាប់រងជាកាតព្វកិច្ច ផ្នែកទី១ ការធានារ៉ាប់រងភារៈទទួលខុស​ត្រូវយាន​យន្ត បានចែងថា រូបវន្តបុគ្គល ឬនីតិបុគ្គលជាម្ចាស់យានយន្ត ដែលប្រកបអាជីវកម្មក្នុងព្រះរាជាណាចក្រកម្ពុជា ត្រូវមាន​ការធានារ៉ាប់រងយានយន្តរបស់ខ្លួនពីក្រុមហ៊ុនធានារ៉ាប់រងណាមួយលើភារៈទទូលខុសត្រូវ ចំពោះរាល់ការខូច​ខាតបង្ក​ឡើង​ដល់តតិយជន ដែលបណ្តាលមកពីសកម្មភាពនៃយានយន្តរបស់ខ្លួនរូមទាំង រ៉ឺម៉កសណ្តោងគ្រប់ប្រភេទ។

ការធានារ៉ាប់រងនេះ មិនត្រឹមតែមានប្រសិទ្ធភាពចំពោះម្ចាស់យានយន្តប៉ុណ្ណោះទេ ប៉ុន្តែត្រូវមានប្រសិទ្ធភាពផងដែរ ចំពោះអ្នកបើកបរ និងអ្នកកាន់កាប់ថែនាំយានយន្ត។ ប្រភេទយានយន្តអាជីវកម្មទាំងឡាយ ដែលត្រូវមានធានារ៉ាប់រង ត្រូវកំណត់ដោយអនុក្រឹត្យ។ ប្រភេទយានយន្តផ្សេងទៀត ដែលតម្រូវឱ្យមានធានារ៉ាប់រងជាកាតព្វកិច្ច ក្រៅពីយានយន្តមានកំណត់នៅក្នុងមាត្រា ៣៣ នៃច្បាប់នេះ ត្រូវកំណត់ដោយអនុក្រឹត្យផងដែរ៕