លោក ហ៊ុន ម៉ាណែត បង្ហាញក្តីសង្ឃឹមពីការពង្រឹង និងពង្រីកទំនាក់ទំនងរវាងកងទ័ពជើងគោកកម្ពុជា-កូរ៉េខាងត្បូង

លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើង គោក បានបង្ហាញក្ដីសង្ឃឹមអំពីការពង្រឹង និងពង្រីកទំនាក់ទំនងរវាងកងទ័ពជើងគោកកម្ពុជា ជាមួយកងទ័ពជើងគោកកូរ៉េខាងត្បូង។

ការបង្ហាញក្តីសង្ឃឹមពីការពង្រឹង និងពង្រីកទំនាក់ទំនងនេះ បានធ្វើឡើងនៅក្នុងជំនួបរវាងលោកឧត្តមសេនីយ៍ឯក ហ៊ុន ម៉ាណែត ជាមួយលោកបណ្ឌិត ផាក ហ៊ឹងខ្យង់ (Park Heung-Kyeong) ឯកអគ្គរដ្ឋទូត នៃសាធារណរដ្ឋកូរ៉េប្រចាំកម្ពុជា និងអមដោយអនុព័ន្ធយោធា នៃសាធារណរដ្ឋកូរ៉េទាំងចាស់ និងថ្មី កាលពីរសៀលថ្ងៃទី ២៨ ខែកក្កដា ឆ្នាំ ២០ ២២។

នៅក្នុងជំនួបនេះ លោកឧត្តមសេនីយ៍ឯក ហ៊ុន ម៉ាណែត បានលើកឡើងអំពីការអភិវឌ្ឍរីកចម្រើន នៃទំនាក់ទំនងលើគ្រប់វិស័យរវាងប្រទេសទាំងពីរ និងបានសង្កត់ធ្ងន់អំពីភាពចាំបាច់ នៃការបន្តថែរក្សានិរន្តរភាពនៃទំនាក់ទំនងដ៏ល្អនេះ ជាពិសេសកិច្ចសហប្រតិបត្តិការផ្នែកយោធា ដូចដែលកងទ័ពជើង​គោក នៃប្រទេសទាំងពីរបានខិតខំអនុវត្តកិច្ចការជាច្រើន និងសម្រេចបាននូវសមិទ្ធផលជាផ្លែផ្កាកន្លងមកនេះ។

លោកក៏បានបង្ហាញក្តីសង្ឃឹមផងដែរថា ជាមួយនឹងការគាំទ្ររបស់ស្ថានទូត និងការិយាល័យអនុព័ន្ធយោធាកូរ៉េនៅកម្ពុជា ទំនាក់ទំនងកម្រិតកងទ័ពជើងគោក នឹងត្រូវបានពង្រឹង និងពង្រីកកាន់តែប្រសើរឡើងថែមទៀត ជាពិសេសការបង្កើនទំនាក់ទំនងផ្ទាល់រវាងអង្គភាព និងអង្គភាព ថ្នាក់យុទ្ធវិធី។

ជាការឆ្លើយតប លោក Park Heung-Kyeong បានរំឭកអំពីកិច្ចខិតខំប្រឹងប្រែង របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងការភ្ជាប់ចំណងការទូតផ្លូវការឡើងវិញ រវាងប្រទេសទាំងពីរនៅក្នុងឆ្នាំ ១៩៩៧ បន្ទាប់ពីត្រូវបានកាត់ផ្តាច់ក្នុងរបបខ្មែរក្រហម។ ផ្តើមចេញមូលដ្ឋាននេះ កិច្ចសហប្រតិ​បត្តិការរវាងប្រទេសទាំងពីរ ក្នុងរយៈពេល ២៥ឆ្នាំមកនេះ មានការអភិវឌ្ឍរីកចម្រើនលើគ្រប់វិស័យ ជាអាទិ៍៖ វិស័យពាណិជ្ជកម្ម, វិនិយោគ, អប់រំ, យោធា, ការបោសម្អាតមីន និងសុខាភិបាលជាដើម។

ចំពោះកិច្ចសហប្រតិបត្តិការយោធាវិញ លោកឯកអគ្គរដ្ឋទូត ក៏បានកត់សម្គាល់អំពីសារៈសំខាន់ នៃការរៀបចំឲ្យមានយន្តការសន្ទនាជាទៀងទាត់ សំដៅធ្វើយ៉ាងណាធានាឲ្យបាននូវនិរន្តរភាព នៃកិច្ចទំនាក់ទំនង។

ក្នុងឱកាសនោះផងដែរ លោក Park Heung-Kyeong ក៏បានសម្តែងនូវការកោតសរសើរ ចំពោះភាពជោគជ័យរបស់កម្ពុជា ក្នុងការគ្រប់គ្រងការរីករាលដាលនៃជំងឺកូវីដ-១៩ ក្នុងរយៈពេលជាង ២ ឆ្នាំកន្លងមកនេះ ព្រមជាមួយនឹងការវាយតម្លៃខ្ពស់ចំពោះសមត្ថភាព និងកិច្ចខិតខំប្រឹងប្រែងរបស់កម្ពុជា ក្នុងនាមជាប្រធានអាស៊ានឆ្នាំ ២០២២ លើការប្រឈមដោះស្រាយបញ្ហាតំបន់ និងសាកល ដែលកំពុងកើតមាន ប្រកបដោយភាពត្រឹមត្រូវ៕

អត្ថបទ៖ កោះកែវ