ក្រសួង ស្នើអភិបាលរាជធានី-ខេត្ត បង្កើនការផ្សព្វផ្សាយការព្យាបាលអ្នកជំងឺកូវីដតាមផ្ទះឱ្យបានទូលំទូលាយថែមទៀត

ក្រសួងសុខាភិបាល បានស្នើឱ្យលោកអភិបាលធានី-ខេត្ត បង្កើនការអប់រំ និងផ្សព្វផ្សាយឱ្យបានទូលំទូលាយជូនដល់សាធារណជន អំពីនីតិវិធីប្រតិបត្តិស្តង់ដារ សម្រាប់គ្រប់គ្រង ថែទាំ និងព្យាបាលអ្នកជំងឺកូវីដ១៩ នៅតាមផ្ទះ ខណៈបច្ចុប្បន្ននេះ មានអ្នកជំងឺកូវីដព្យាបាលនៅតាមផ្ទះច្រើន។

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈ​​កម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩បានឱ្យដឹងនៅក្នុងសេចក្តីជូនព័ត៌មានចុះកាលពីយប់ថ្ងៃទី២៩ កក្កដាថាយោងចំណារឯកភាពដ៏ខ្ពង់ខ្ពស់របស់ សម្ដេចតជោនាយករដ្ឋមន្ត្រី ចុះថ្ងៃទី២៨ ខែកក្កដា ឆ្នាំ២០២២ លើរបាយការណ៍ចុះថ្ងៃទី២៧ ខែកក្កដា ឆ្នាំ២០២២ របស់គណៈប្រចាំការ នៃ គ.ប.ក។

លោករដ្ឋមន្ត្រីបានបន្តថា ក្រសួង សុខាភិបាលបានដាក់ឲ្យអនុវត្តនូវវិធីប្រតិបត្តិស្តង់ដារសម្រាប់គ្រប់គ្រង ថែទាំ និងព្យាបាលអ្នកជំងឺកូរីដ១៩- គ្មានរោគសញ្ញា និងកម្រិតស្រាល នៅតាមផ្ទះ ដូចមានចែងក្នុងប្រកាសលេខ ២៩៦ សខល ចុះថ្ងៃទី២០ ខែមិថុនា ឆ្នាំ២០២១។ ជាមួយគ្នានេះ ដោយប្រជាពលរដ្ឋភាគច្រើនបានធ្វើតេស្តរហ័សរកអង់ទីហ្សែនកូវីដ-១៩ដោយខ្លួនឯង ទទួលបានលទ្ធផលវិជ្ជមានហើយជាករណីស្រាល និងបានជ្រើសរើសយកការព្យាបាលនៅពាមផ្ទះ។ ដូច្នេះ ដើម្បីបង្កើនការអប់រំនិងផ្សព្វផ្សាយឱ្យបានទូលំទូលាយដល់សាធារណជន ក្រសួងសុខាភិបាលបានរៀបចំសេចក្តីសង្ខេបនីតិវិធីប្រតិបត្តិស្តង់ដារសម្រាប់គ្រប់គ្រង ថែទាំ និងព្យាបាលអ្នកជំងឺកូរីដ ១៩ នៅតាមផ្ទះ (ដូចមានជូនភ្ជាប់មកជាមួយ) ដើម្បីមានភាពងាយស្រួលក្នុងការអនុវត្ត។

គិតត្រឹមថ្ងៃទី២៩ ខែកក្កដា ឆ្នាំ២០២២កម្ពុជារកឃើញអ្នកឆ្លងជំងឺកូវីដ១៩ សរុបចំនួន ១៣៦ ៧០៦ ករណី, អ្នកជាសះស្បើយសរុបចំនួន ១៣៣ ៤៦៩ នាក់, ស្លាប់សរុបចំនួន ៣ ០៥៦ នាក់៕

ដោយ៖ សំអឿន