ម្ចាស់​លំនៅឋាន​នៅតំបន់​អភិរក្ស​បេតិកភណ្ឌ​ក្រុងបាត់ដំបង​សម្រុករុះរើ​សំយាបផ្ទះ​ ៨០ ភាគរយ

​ក្រោយពីរដ្ឋបាលសាលាក្រុងបាត់ដំបង​បានចេញសេចក្តីជូនដំណឹងដល់ម្ចាស់លំនៅឋាន​ដែល​រស់​នៅក្នុងតំបន់អភិរក្សសំណង់បុរាណដែលជាបេតិកភណ្ឌក្នុងក្រុងកាលពីថ្ងៃទី ២៥ ខែកក្កដា រហូត​ដល់ថ្ងៃទី ០១ខែសីហា នេះដែលជាថ្ងៃត្រូវផុតឱសានវាទ គេឃើញម្ចាស់លំនៅឋានខ្នះខ្នែង​ស្វែងរកជាងមករុះរើជាបន្តបន្ទាប់។

​កម្លាំងបញ្ជាការកងឯកភាពខេត្តបានបញ្ជាក់ឲ្យដឹងនៅថ្ងៃទី ០១ ខែសីហា ឆ្នាំ ២០២២នេះថា ក្រោយការជូនដំណឹងបន្តបន្ទាប់ ជាច្រើនថ្ងៃកន្លងមករហូតដល់ថ្ងៃទី ០១ ខែសីហានេះដែលជាថ្ងៃផុតកំណត់មានបងប្អូនជាម្ចាស់លំនៅឋានភាគច្រើនបានចូលរួមរុះរើសំយាបមុខផ្ទះរបស់ពួកគាត់រៀងៗខ្លួនដោយមានស្មាតីសហការខ្ពស់មកទល់ម៉ោង ១០ ព្រឹកនេះពួក គាត់បានរុះរើបានប្រមាណជា ៨០%ហើយ។ ចំពោះបងប្អូនម្ចាស់ផ្ទះ​មួយចំនួនទៀត​បានស្នើសុំពន្យាពេលក្នុងរយៈពេលខ្លីដោយសារពួកគាត់រកជាងមិនទាន់បាន។

​លោក ផេង សិទ្ធី អភិបាលក្រុងបាត់ដំបងបានបញ្ជាក់ជុំវិញការរៀបចំតំបន់អភិរក្សនេះថា ការរៀបចំ​តំបន់អភិរក្សក្នុងក្រុងនេះ ដើម្បីលើកកម្ពស់សណ្តាប់ធ្នាប់សោភ័ណភាព និងបរិស្ថានឲ្យបានល្អ​ប្រសើរទាក់ទាញភ្ញៀវទេសចរជាតិ អន្តរជាតិឲ្យចូលមកលេងកម្សាន្តក្នុងទឹកដីវប្បធម៌ ប្រវត្តិសាស្ត្រ ប្រកបដោយសក្តានុពលរបស់យើងទាំងអស់គ្នាពិសេសសំដៅលើការប្រកួតប្រជែងជាសកលនៅលើឆាកអន្តរជាតិ។

ការកែសម្រួលតាមគំរូ និងគោលការណ៍ណែនាំរបស់រដ្ឋបាលខេត្តបាត់ដំបងនេះអនុវត្តន៍ទៅលើលំនៅឋានបុរាណត្រង់ចំណុចផ្លូវខេត្តលេខ ១កន្លះ ផ្លូវលេខ ២ ផ្លូវលេខ ២កន្លះ ផ្លូវខេត្តលេខ ៣ និង​កំណាត់​ផ្លូវកាត់ទទឹងមួយចំនួនទៀត ដែលនៅក្នុងរង្វង់តំបន់អភិរក្សចាប់ពីចំណុចវត្តពិភិទ្ធារាមដល់វត្តដំរីស ក្នុងភូមិសាស្ត្រក្រុងបាត់ដំបង ដោយក្នុងនោះតម្រូវឲ្យម្ចាស់លំនៅឋានសហការ​កែ​សម្រួល និងរុះរើសំយាបផ្ទះ ផ្ទាំងប៉ាណូពាណិជ្ជកម្មគ្រប់ប្រភេទចេញ អនុញ្ញាតិត្រឹមតែ ១ភាគ ៣ នៃខឿនផ្លូវមុខ ឬចំហៀងផ្ទះ និងមានកម្ពស់ស្មើៗគ្នាតាមការកំណត់របស់ក្រុមការងារប៉ុណ្ណោះ៕

អត្ថបទ៖ សៅ សារិទ្ធ