សម្ដេចតេជោ ហ៊ុន សែន បង្ហោះរូបភាពមួយសន្លឹករបស់សម្ដេចនាពេលកន្លងមក ដែលជាការរៀបចំវេទិកាតាមភ្លឺ​​ស្រែជាមួយប្រជាជន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី ២ ខែសីហា ឆ្នាំ ២០២២នេះ បានបង្ហោះរូបភាពមួយសន្លឹក របស់សម្ដេចនាពេលកន្លងមក ដែលជាការរៀបចំវេទិកាតាមភ្លឺ​​ស្រែជាមួយប្រជាជន។ សម្ដេចតេជោនាយករដ្ឋមន្ត្រី បានលើកឡើងថា ត្រូវធ្វើមន្ត្រីជើងពីរ មិនត្រូវធ្វើមន្ត្រីជើង១០នោះឡើយ ហើយត្រូវរត់ទៅរកការងារធ្វើ កុំរង់ចាំការងាររត់មករកយើង។

តាមរយៈទំព័រហ្វេសប៊ុក សម្ដេចតេជោ ហ៊ុន សែន បានសរសេរថា ដើម្បីមានស្បៀងគ្រប់គ្រាន់សម្រាប់ចិញ្ចឹមប្រជាជនយើងត្រូវធ្វើវេទិកាតាមភ្លឺស្រែ ជាមួយប្រជាជន។ ពេលនោះការពិភាក្សាផ្តោតសំខាន់លើការដោះស្រាយទឹក ការប្រើប្រាស់ពូជការប្រើប្រាស់ដី ជី ថ្នាំសម្លាប់សត្វល្អិតការបែងចែកតំបន់ដាំដុះ ការចិញ្ចឹមត្រីនិងសត្វ។ល។

សម្ដេចតេជោនាយករដ្ឋមន្ត្រី បានសរសេរបន្តថា ការឆ្លងឆ្លើយរវាងប្រជាជន និងនាយករដ្ឋមន្ត្រី បានធ្វើឲ្យវេទិកាមានជោគជ័យ ដែលយើងបានដោះស្រាយសំណូមពររបស់ប្រជាជន មិនត្រឹមតែវិស័យ​កសិ​កម្ម​ប៉ុណ្ណោះទេ តែយើងបានដោះស្រាយសាលារៀន ផ្លូវ ស្ពាន ស្រះទឹក អណ្តូងទឹកវត្តអារាម។ល។បានយ៉ាងច្រើនទៀតផង។

សម្ដេចតេជោនាយករដ្ឋមន្ត្រី បានលើកឡើងតាមរយៈសំណេរនេះថា «ពីប្រទេសដែលខ្វះស្រូវ​ប្រមា​ណ ១លានតោននាទសវត្សរ៍ ១៩៩០ និងដើមឆ្នាំ ២០០០ ពេលនេះយើងសល់ស្រូវជាង ៦លានតោនជាមួយដំណាំកសិកម្មផ្សេងទៀត មានការរីកចំរើនយ៉ាងខ្លាំង ដែលធ្វើឲ្យយើងដោះស្រាយបានតម្រូវការក្នុងស្រុក និងការនាំចេញផងដែរ»។

ប្រមុខរាជរដ្ឋាភិបាល បានសរសេរបន្ថែមថា «វេទិកាតាមវាលស្រែធ្វើមិនតិចជាង ១០ដងនោះទេ ដែលមាននៅខេត្តកណ្តាល កំពង់ស្ពឺ តាកែវ កំពង់ឆ្នាំង ពោសាត់ កំពង់ធំ។ កូនស្រីច្បងរបស់ខ្ញុំ មានទម្លាប់ដើរតាមឪពុកតាំងពីតូច គេធ្លាប់ទៅតាមខ្ញុំបានប៉ុន្មានកន្លែងដែរ ក្នុងវេទិកាតាមភ្លឺស្រែនេះ»។

សម្ដេចតេជោ ហ៊ុន សែន បានលើកឡើងទៀតថា «ស្តាប់ប្រជាជននិយាយ ទទួលដោះស្រាយសំណូមពរសមហេតុ សមផលរបស់ប្រជាជន ទើបយើងរៀបចំគោលនយោបាយបានត្រឹមត្រូវ។ ត្រូវធ្វើមន្ត្រីជើងពីរមិនត្រូវធ្វើមន្ត្រីជើង១០នោះឡើយ និងត្រូវរត់ទៅរកការងារធ្វើ កុំរង់​ចាំការ​ងាររត់មករកយើង»៕