​តុលាការផ្តន្ទាទោសអតីតស្នងការរងខេត្តកំពង់ឆ្នាំងជាប់ពន្ធនាគារ ៤ ឆ្នាំ ​ពាក់ព័ន្ធនឹងការ​ទន្ទ្រាន​ដីព្រៃ​លិចទឹក

​លោក លិ សុខា ​ចៅក្រមជំនុំជម្រះ​សាលាដំបូងរាជធានីភ្នំពេញ​នៅព្រឹកថ្ងៃទី ៤ ខែសីហា ឆ្នាំ ២០២២​ បានប្រកាស​សាលក្រមផ្តន្ទាទោស​លោក ស៊ុំ សុជាតិ ​អតីត​ស្នងការរងខេត្តកំពង់ឆ្នាំង​ ដាក់ពន្ធនា​គាររយៈពេល ​៤ឆ្នាំ ពាក់ពន្ធដីធ្លីនៅតំបន់ ៣ បឹងទន្លេសាប ខេត្តកំពង់ឆ្នាំង។

​សាលក្រម​ក៏បានសម្រេច​ពិន័យ​ជាប្រាក់ចូលថវិការរដ្ឋ​ចំនួន ៥០ ​លានរៀល​ ព្រមទាំងដកហូតប្រាក់​ជាង ៥០ ម៉ឺនដុល្លារអាមេរិក ​ពាក់ព័ន្ធនឹងបទបំផ្លិចបំផ្លាញ និងគៃបំបាត់ បទហ៊ុមព័ទ្ធកាន់កាប់ដីព្រៃ លិចទឹកបទមិនប្រកាសទ្រព្យសម្បត្តិ និងបំណុល និងបទសម្អាតប្រាក់។

កាលពីព្រឹកថ្ងៃទី ២១ ខែកក្កដា ឆ្នាំ ២០២២ តុលាការបានលើកយកសំណុំរឿងខាងលើនេះមកបើកសវនាការជំនុំជម្រះក្តីពាក់ព័ន្ធករណីបំផ្លិចបំផ្លាញហ៊ុមព័ទ្ធកាន់កាប់ដីព្រៃលិចទឹកនៅចំណុចតំបន់ ៣ នៃបឹងទន្លេសាបក្នុងភូមិសាស្ត្រ ភូមិកង្កែប និងភូមិធ្លក ឃុំច្រណូក ស្រុកកំពង់លែង ខេត្តកំពង់ឆ្នាំង។

សវនាការបានសាកសួរដេញដោលចប់សព្វ និងបានលើកពេលប្រកាសសាលក្រមផ្តន្ទាទោសលើជនជាប់ចោទនៅថ្ងៃទី ៤ សីហា នេះ។ សំណុំរឿងនេះលោក កូយ សៅ អនុប្រធានសាលាដំបូង រាជធានីភ្នំពេញជាចៅក្រមស៊ើបសួរនៅព្រឹកថ្ងៃទី ១៩ ខែធ្នូ ២០២១ បានសម្រេចចេញដីកាឃុំខ្លួន ស្នងការរង និងប្រធានការិយាល័យអន្តរាគមន៍ និងតម្រួតបទបញ្ជា នៃស្នងការដ្ឋាននគរបាល ខេត្តកំពង់ឆ្នាំងដាក់ពន្ធនាគារជាបណ្តោះអាសន្ន។

ការសម្រេចឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញដោយយោងទៅលើស្ថាប័ន អយ្យការបានចោទប្រកាន់ឧត្តមសេនីយ៍ត្រី ស៊ុំ សុជាតិ ហៅ ឈុយ ជាស្នងការរង ខេត្តកំពង់ឆ្នាំង ពីបទបំផ្លាញ និងគៃបំបាត់បទហ៊ុមព័ទ្ធ កាន់កាប់ដីព្រៃលិចទឹក បទមិនប្រកាសទ្រព្យសម្បត្តិ និងបំណុល និងបទសម្អាតប្រាក់ ប្រព្រឹត្តនៅចំណុចដែនព្រៃលិចទឹក តំបន់ ៣ នៃបឹងទន្លេសាប ក្នុងភូមិសាស្ត្រ ភូមិកង្កែប និងភូមិធ្លក ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងឆ្នាំ ២០១៧ ដល់ ឆ្នាំ ២០២១ ជាបទល្មើស ព្រហ្មទណ្ឌ និងត្រូវផ្តន្ទាទោសតាមបញ្ញត្តិមាត្រា ៦០៨ ខែ ក្រមព្រហ្មទណ្ឌ និងមាត្រា ៨៨ នៃច្បាប់ស្តីពីជលផល និងមាត្រា ៣២ មាត្រា ៣៨ នៃច្បាប់ស្តីពីការប្រឆាំងអំពើពុករលួយ និងមាត្រា ៣ ថ្មី មាត្រា ២៨ ថ្មី ១ នៃច្បាប់ស្តីពីវិសោធនកម្ម ច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម៕

អត្ថបទ៖ មករា

​