អាជ្ញាធរ ជំរុញម្ចាស់អាជីវកម្មទេសចរណ៍​ប្រញាប់ស្នើសុំអាជ្ញាបណ្ណ​ចៀសវាងការផាកពិន័យ

សូមម្ចាស់អាជីវកម្ម សេវាកម្មដែលមិនទាន់មានអាជ្ញាបណ្ណទេសចរណ៍ សូមរួសរាន់ដាក់ពាក្យស្នើសុំអាជ្ញាបណ្ណ ដើម្បីចៀសវាងការផាកពិន័យអន្តរការណ៍។ នេះជាការលើកឡើងរបស់លោក នួន ថា អនុប្រធានមន្ទីរទេសចរណ៍​ខេត្តបាត់ដំបង ខណៈដែលលោកដឹកនាំមន្រ្តីអធិការកិច្ច ចុះតាមមូលដ្ឋានអាជីវកម្ម សេវាកម្មទេសចរណ៍ក្នុងក្រុង​បាត់ដំបង ដើម្បីពង្រឹងការអនុវត្តច្បាប់ស្តីពីទេសចរណ៍ កាលពីថ្ងៃចុងសប្តាហ៍កន្លងទៅ។

តាមរយៈមន្ទីរទេសចរណ៍ខេត្តបាត់ដំបង បានទាញច្បាប់ស្តីពីទេសចរណ៍ មកបង្ហាញដូច្នេះថា យោងតាម មាត្រា ៣២ ជំពូកទី៥ នៃច្បាប់ស្តីពីទេសចរណ៍ « គ្មានបុគ្គលណាម្នាក់អាចប្រកបអាជីវកម្មទេសចរណ៍បានទេ ប្រសិនបើបុគ្គល​នោះមិនបានទទួលការផ្តល់អាជ្ញាបណ្ណទេសចរណ៍ពីក្រសួងទេសចរណ៍ ឬពីរដ្ឋបាលក្រោមជាតិ។ ក្នុងករណីដែល​អាជីវកម្ម​ច្រើនប្រភេទ ត្រូវបានប្រតិបត្តិដោយបុគ្គលតែម្នាក់ចេញពីទីតាំងតែមួយប្រភេទអាជីវកម្មនីមួយៗ ត្រូវតែមានអាជ្ញាបណ្ណផ្សេងៗគ្នា ប្រៀបដូចជាអាជីវកម្មផ្សេងគ្នាដែលប្រតិបត្តិចេញពីទីតាំងផ្សេងគ្នាយ៉ាងដូច្នោះដែរ។ ក្នុងករណីដែលបុគ្គលម្នា ក់មានអាជីវកម្មទេសចរណ៍មួយប្រភេទ ហើយមានសាខាច្រើនកន្លែង សាខានីមួយៗនោះ ត្រូវតែមានអាជ្ញាបណ្ណទេសចរណ៍»។

មាត្រា ៦៥ នៃជំពូកទី១០ បានចែងថា «បុគ្គលណាដែលប្រកបអាជីវកម្មទេសចរណ៍ដោយគ្មានអាជ្ញាបណ្ណទេសចរណ៍ ត្រូវទទួលពិន័យអន្តរការណ៍ ដែលអប្បបរមាស្មើនឹង ២,០០០,០០០ (ពីរលាន)រៀល និងអតិបរមា មិនលើសពី ២០,០០០,០០០ (ម្ភៃលាន) រៀល។ ទំហំទឹកប្រាក់នែការពិន័យអន្តរការណ៍ សម្រាប់ប្រភេទអាជីវកម្មទេសចរណ៍នីមួយៗ ត្រូវកំណត់ដោយប្រកាសរបស់រដ្ឋមន្រ្តីក្រសួងទេសចរណ៍»។

ដើម្បីទាក់ទាញភ្ញៀវទេសចរ រដ្ឋបាលខេត្ត និងរដ្ឋបាលក្រុងបាត់ដំបង បានរៀបចំសោភ័ណទីក្រុង ដោយចុះកាត់​សំយ៉ាបផ្ទះ និងផ្ទាំងប៉ាណូផ្សព្វផ្សាយពាណិជ្ជកម្មធំៗ ដែលបិតបាំងអគារបុរាណ មានអាយុកាលរាប់ទស្សវត្សន៍មកនេះ ។ អាជ្ញាធរ បានលើកឡើងថា ការរៀបចំរុះរើសំយ៉ាប ផ្ទាំងប៉ាណូពាណិជ្ជកម្មទាំងអស់នេះ នឹងធ្វើការកែ​សម្រួលជំនួស​មកនូវសំយ៉ាបផ្ទះ និងផ្ទាំងពាណិជ្ជកម្មទៅតាមគោលការណ៍របស់រដ្ឋបាលខេត្តបាត់ដំបងបានកំណត់ ។

លោក សុខ លូ អភិបាល នៃគណៈអភិបាលខេត្តបាត់ដំបង បានលើកឡើងកន្លងមកថា ការរៀបចំសណ្តាប់ធ្នាប់នេះ ដើម្បីឱ្យទីក្រុងបាត់ដំបងកាន់តែមានសោភ័ណភាពស្រស់ស្អាត និងអាចស្រូបទាញភ្ញៀវទេសចរណ៍ជាតិ និងអន្តរជាតិ​មកទស្សនាកម្សាន្ត រូបរាងពេញលេញនូវអគារបុរាណ ដែលបន្សល់ទុកពីសម័យអាណានិគមនិយមបារាំង និងដើម្បីប្រកួត​ប្រជែងជាទីក្រុងស្អាតអាស៊ានផងដែរ៕