តាមស្រាវជ្រាវឃាត់ខ្លួនជនល្មើស និងបញ្ជូនសំណុំរឿង ទន្ទ្រានយកដីរបស់រដ្ឋ ទៅសាលាដំបូង

លោក សៅ វ៉ាន្នី នាយផ្នែករដ្ឋបាលព្រៃឈើសណ្ដាន់ ខេត្តកំពង់ធំ បានឱ្យដឹងនៅថ្ងៃទី ៨ ខែសីហានេះថា ខណៈនេះ មន្ត្រីជំនាញបានតម្រុយខ្លះៗហើយ និងកំណត់មុខសញ្ញាជនល្មើស ដើម្បីឃាត់ខ្លួន និងបញ្ជូនសំណុំរឿងទៅកាន់សាលាដំបូងខេត្តកំពង់ធំ ចាត់ការតាមច្បាប់ ក្នុងករណីទន្ទ្រានយកដីរដ្ឋជាកម្មសិទ្ធិផ្ទាល់ខ្លួន នៅចំណុចថ្នាលបណ្តុះកូនឈើ រដ្ឋបាលព្រៃឈើស្រុកសណ្តាន់។

លោក សៅ វ៉ាន្នី បញ្ជាក់ថា រយៈពេលប្រមាណជាង ១ ខែនេះ ក្រុមជនល្មើសបានលួចយកកូនស្វាយចន្ទី ដំឡូង និងចេក ទៅដាំលើទីតាំងខាងលើ ហើយដីនោះមិនមែនជាដីដំណាំទេ គឺជាដីព្រៃឈើ។ លោកបញ្ជាក់ឱ្យដឹងថា ថ្នាល់បណ្តុះកូនឈើមានផ្ទៃដីជាង ៣ ហិកតា បង្កើតតាំងពីឆ្នាំ២០១១ មកម្ល៉េះ។ កាលពីខែវិច្ឆិកា ឆ្នាំ២០២១ មានជនសង្ស័យ បានកាប់រានព្រៃហ៊ុមព័ទ្ធ ឈូសឆាយដីព្រៃ កាន់កាប់ដីព្រៃឈើ ហើយមន្ត្រីជំនាញបានទៅសំងំចាប់ជនល្មើសនោះ តែមិនបាន ក្រោយមកទៀតជនសង្ស័យបានលួចធ្វើរបង។

បន្ទាប់មកអាជ្ញាធរមានសមត្ថកិច្ចបានសុំយោបល់ព្រះរាជ្ញាអមសាលាដំបូងខេត្តកំពង់ធំ រហូតចុងឆ្នាំ២០២១ ក៏បានបង្កើតក្រុមការងារ មានភូមិ ឃុំ និងជំនាញដោយមានការសម្របសម្រួលដោយព្រះរាជអាជ្ញា ដើម្បីទៅរុះរើរបងដែលជនល្មើសបោះយកដីព្រៃឈើខាងលើនេះ ហើយជំនាញបានបញ្ជូនសំណុំរឿងទៅតុលាការហើយ ដោយដាក់បណ្តឹងជាអត្តសញ្ញាណជន។

ទាក់ទងករណីនេះ លោក អ៊ុត វណ្ណរ៉ា អភិបាលស្រុកសណ្តាន់ បានឱ្យដឹងថា បញ្ហាខាងលើនេះ គឺមានបញ្ហាយូរណាស់មកហើយ តែខាងជំនាញរដ្ឋបាលព្រៃឈើថា ជាទីតាំងថ្នាលបណ្តុះកូនឈើ ក្នុងដែនរបស់ខ្លួនគ្រប់គ្រង៕

អត្ថបទ៖  ឈាង  មករា