​ឧត្តមសេនីយ៍​ឯក ហ៊ុន ម៉ាណែត​ រំឭកពីការចងលក្ខខណ្ឌ​តឹងរ៉ឹងលើការរើសកងទ័ព​ និងដំឡើងសក្ដិ​

​លោក​ឧត្តមសេនីយ៍​ឯក ហ៊ុន ម៉ាណែត អគ្គ​មេបញ្ជាការ​រង​កងយោធពលខេមរភូមិន្ទ និង​ជា​មេបញ្ជាការ​កងទ័ព​ជើងគោក បានចែករំលែក​អំពីទស្សនៈផ្ទាល់ខ្លួន​ពាក់ព័ន្ធនឹងការដឹកនាំកង​ទ័ពជើងគោក។

​លោក ហ៊ុន ម៉ាណែត ​បញ្ជាក់ថា ​គោលការណ៍​ជ្រើសរើស​កងទ័ពជើងគោក​មាន២ ទី១បំពេញ​ទ័ពសេរី គឺបណ្ដាអង្គភាពស្នើសុំសិទ្ធិប្រគល់ឱ្យ​តែបំពេញទ័ពសោធនយើងរើស ប៉ុន្តែចូល​មកត្រូវមានលក្ខខណ្ឌពិតតែឱ្យអាទិភាពទៅលើសាច់ញាតិបង្កើត​របស់យោធិន​ដែលកំពុង​បម្រើការងារ ប៉ុន្តែលោកបញ្ជាក់ថា លោកបានចងលក្ខខណ្ឌ​ថាទី១ ត្រូវបំពេញការហ្វឹកហ្វឺន​រយៈពេល ៣ ខែ ចប់ពីសាលាហ្វឹកហ្វឺនបឋម ៣ ខែ ទើបបានឱ្យចូល ហើយបញ្ជូនទៅតាម​អង្គភាព​តាមការចាត់តាំង​របស់កងទ័ព​ជើងគោក។

លោក ហ៊ុន ម៉ាណែត បញ្ជាក់ បន្ទាប់ពីមានមតិមួយចំនួនបានលើកឡើងពីភាពតឹងរ៉ឹង ជុំវិញ​ការ​ជ្រើស​រើសទ័ព ការផ្ទេរអង្គភាពទ័ព ការតែងតាំង និងការដំឡើងឋានន្តរស័ក្តិ​ក្នុងកងទ័ពជើងគោក។

​លោក​ឧត្តមសេនីយ៍​ឯក ហ៊ុន ម៉ាណែត បន្តថា រយៈពេល ២៤ ខែទើបអាចទទួល​បានឱ្យស្នើ​សុំផ្ទេអង្គភាព បើចង់ស្នើសុំ អង្គភាពជើងគោកនឹងពិនិត្យ។

លោក​ឧត្តមសេនីយ៍​ឯក ហ៊ុន ម៉ាណែត “ព្រោះបើមិនអញ្ចឹងហ្នឹង យើងនឹងទទួលហានិភ័យ​ព្រោះ​មានស្ថាប័នមួយ គាត់បំពេញទ័ព ៤៨០ នាក់ ទៅវរសេនាតូចព្រំដែន១ ក្នុងរយៈពេល ២ ខែទ័ពគាត់​បាត់អស់ ៦០ ភាគរយ ដោយសារសំណើរផ្ទេរពីអង្គភាពព្រំដែន មកគរជើនៅខាងលើ អត់ទេ ​អញ្ចឹងនរណាដែលចូល​លើកនេះគឺ ២៤ ខែ បានឱ្យសិទ្ធិនៅក្នុងការសុំផ្ទេរ ហើយមិនមែនថា ឱ្យផ្ទេរស្វ័យប្រវត្តិទេ”។

លោក​ឧត្តមសេនីយ៍​ឯក ហ៊ុន ម៉ាណែតបន្តថា លក្ខខណ្ឌ ចូលកងទ័ព​គឺមិនឱ្យមាន​កាតព្វកិច្ចអ្វីទេ​ដែលប៉ះពាល់ដល់ការងារ ឧទាហរណ៍ គាត់រៀនឆ្នាំទី២ គាត់សុំចូលដែរគឺមិនទាន់បានទេគឺតម្រូវ​ឱ្យរៀនចប់។

លោក ហ៊ុន ម៉ាណែត “សំខាន់មួយទៀត ខ្ញុំចង់ឱ្យទាហានដែលចូលថ្មី ឱ្យតម្លៃកងទ័ព ព្រោះកងទ័ព​មិនគ្រាន់តែជាក្របខណ្ឌមួយដាក់ក្នុងហោប៉ៅទុកទេ ចូលមកត្រូវបំពេញភារកិច្ចឱ្យតម្លៃកងទ័ព​យល់ការលំបាក”។

លោក​ឧត្តមសេនីយ៍​ឯក ហ៊ុន ម៉ាណែតបញ្ជាក់ថា រឿងឋានន្តរស័ក្ដិលើស្មាមិនសំខាន់ ហើយអ្វីដែល​ជំនាញក្នុងខ្លួន គឺតួនាទីភារកិច្ច និងការទទួលខុសត្រូវការងាររបស់ខ្លួន៕

អត្ថបទ៖ ឡេង ដេត