សមត្ថកិច្ច​បង្ក្រាប​បទល្មើសនេសាទ​នៅក្នុងស្រុក៣​រុះរើរបាំងសាច់អួន ​២០កន្លែង​ប្រវែងជាង​១ពាន់​ម៉ែត្រ

សមត្ថកិច្ចចម្រុះរួមមានខណ្ឌរដ្ឋបាលជលផលសហការជាមួយគណៈបញ្ជាការឯកភាពស្រុកបរិបូណ៌ ស្រុកជលគីរី និងស្រុកកំពង់ត្រឡាច នៅថ្ងៃទី ១០ ខែសីហាឆ្នាំ២០២២ បានចុះប្រតិបត្តិការបង្រ្កាបបទល្មើសជលផល ដោយបានកាប់បំផ្លាញ និងរុះរើរបាំងលបសាច់អូនខុសច្បាប់ចំនួន ២០ កន្លែងមានប្រវែងជាង ១ពាន់ម៉ែត្រ។

លោក លីឡា នាយខណ្ឌរដ្ឋបាលជលផលកំពង់ឆ្នាំងបានឱ្យដឹងថា បទល្មើសនេសាទដែលបានបង្ក្រាបនោះមាននៅចំណុចជ្រោយអ្នកតា ចំណុចខ្សាច់ស ក្រោយភូមិសេះស្លាប់ និងកំពង់អួរ ក្នុងស្រុកបរិបូរណ៌ និងភូមិគៀនតាម៉ាក្នុងស្រុកជលគីរី និងនៅក្នុងភូមិសាស្ត្រស្រុកកំពង់ត្រឡាចផងដែរ។

នៅក្នុងកិច្ចប្រតិបត្តិការនេះបានប្រើប្រាស់កម្លាំងសរុបចំនួន ២៣ នាក់ ដោយប្រើមធ្យោបាយកាណូតបាឡាស្មាច់ចំនួន ៧ គ្រឿ។ លទ្ធផលបំផ្លាញចោលរបាំងសាច់អួនចំនួន មានប្រវែង ៤៥០ ម៉ែត្រលបលូ​សាច់អួន ចំនួន០៦មាត់។ រុះរើរបាំងស្បៃមុងចំនួន២ករណីស្មើនិង ១៥ កន្លែង ប្រវែង៥៧៥ ម៉ែត្រ លបលូស្បៃមុង ចំនួន១៣មាត់។

រុះរើរបាំងព្រួលរាំងផ្ចិតព្រែក០១ករណីស្មើនឹង ១៥ ម៉ែត្រ លបឬស្សី ចំនួន ៤ គ្រឿង ព្រួលឬស្សីចំនួន ១០ ផែនស្មើ និង ៥០ម៉ែត្រ បង្គោល ៦៤៥ ដើម និងបានចាក់លែងត្រីចម្រុះចំនួន ១២០ គីឡូទៅក្នុងទន្លេធម្មជាតិវិញ។

លោកនាយខណ្ឌជលផលកំពង់ឆ្នាំងបានបញ្ជាក់ឱ្យដឹងទៀតថា អនុវត្តតាមបទបញ្ជារបស់ប្រមុខរាជរដ្ឋាភិបាលកិច្ចប្រតិបត្តិការចុះបង្ក្រាបបទល្មើសនេសាទនេះនឹងបន្តធ្វើដូចភ្លៀងរលឹមជាបន្តបន្ទាប់រៀងរាល់ថ្ងៃ ដោយមិនទុកឲ្យកើតមា នបទល្មើសនេសាទ អាណាធិបតេយ្យនៅក្នុងភូមិសាស្រ្តខេត្តកំពង់ឆ្នាំងនោះឡើយ៕

អត្ថបទ៖ ឈៀងថារិទ្ធ