ភ្លៀង៣ម៉ោងយប់មិញនៅព្រះសីហនុ ជន់លិចផ្ទះពលរដ្ឋ៣សង្កាត់

ភ្លៀងមួយមេធំនៅម៉ោង២យប់ទឹកភ្លៀងបានជន់លិចផ្លូវ និងផ្ទះប្រជាពលរដ្ឋអស់ជាច្រើនខ្នងនៅក្នុងសង្កាត់ចំនួន៣ ក្នុងនោះសង្កាត់លេខ១ម្តុំឃ្លាំងលើ ទី២សង្កាត់លេខ២ ម្តុំស្រែត្រកួន និងទី៣សង្កាត់លេខ៤ ទឹកភ្លៀងជនលិចខ្លាំងនៅម្តុំអូរ២ និងអូរ៣ និងអូរ៤ ស្ថិតក្នុងក្រុង/ខេត្តព្រះសីហនុ។

ជំនន់ទឹកភ្លៀងនេះ បើតាមប្រជាពលរដ្ឋរស់នៅកន្លែងកើតហេតុបាននិយាយថា មេឃបានចាប់ផ្តើមភ្លៀងនៅម៉ោងប្រហែល២យប់រំលងអាធ្រាត្រថ្ងៃទី១១ ខែសីហា ឆ្នាំ២០២២។ មេឃបានភ្លៀងយ៉ាងខ្លាំងប្រមាណ៣ម៉ោងទើបរៀងថយបន្តិច ពោលរហូតដល់ម៉ោងប្រមាណ៥ភ្លឺ។ ករណីទឹកភ្លៀងជនលិចភូមិឋាននេះធ្វើឲ្យប្រជាពលរដ្ឋរស់នៅតំបន់លិចទឹកនេះសម្តែងការអាក់អន់ស្រពន់ចិត្តយ៉ាងខ្លាំង ព្រោះពេញ១យប់ពួកគាត់មិនបានដេកពួននោះទេ។ ព្រឹកឡើងនាំគ្នាបាចទឹកនិងបោសសំអាតទឹកភក់។

ពាក់ព័ន្ធភ្លៀងលិចៗនេះ ប្រជាពលរដ្ឋបាននាំគ្នាថា វាជារឿងកើតឡើងដដែលៗនៅក្រុងព្រះសីហនុ ទោះបីជាកន្លងមកនិងក្នុងពេលបច្ចុប្បន្នអាជ្ញាធរក្រុងខេត្តបានបញ្ជូនគ្រឿងចក្ររួមទាំងមន្ត្រីចុះទៅកាយស្តារអូរ កែប្រព័ន្ធប្រឡាយដើម្បីបញ្ចៀសការជនលិចពីជំនន់ទឹកភ្លៀងនៅរដូវវស្សាក៏ដោយចុះ ។

ពាក់ព័ន្ធជំនន់ទឹកភ្លៀងនេះដែរ បើតាមក្រុមប្រជាពលរដ្ឋដែលរងគ្រោះបាននិយាយថា គាត់ឆ្ងល់ថាអូរប្រឡាយ បានកាយនិងស្តារអស់ហើយ ចុះហេតុអ្វីអោយតែមេឃភ្លៀងខ្លាំងតែបន្តិច ទឹកភ្លៀងតែងតែហូរជនលិចចូលផ្ទះពួកគាត់ ដោយកន្លែងខ្លះទឹកលិចចង់ត្រឹមដើមទ្រូង និងកន្លែងផ្ទះត្រឹមជង្គង់។ជាក់ស្តែងដូចជាករណីភ្លៀងយប់មិញអញ្ចឹង៕

អត្ថបទ៖ ស៊ុយ ចាន់ធា