អាជ្ញាធរខេត្តស្ទឹងត្រែងឲ្យពលរដ្ឋប្រុងប្រយ័ត្នពីគ្រោះទឹកជំនន់

អាជ្ញាធរខេត្តស្ទឹងត្រែង បានណែនាំឲ្យប្រជាពលរដ្ឋមានការប្រុងប្រយ័ត្នអំពីគ្រោះមហន្តរាយទឹកជំនន់ ខណៈទឹកនៅតាមបណ្តាទន្លេនានាក្នុងភូមិសាស្ត្រខេត្តស្ទឹងត្រែងនាប៉ុន្មានថ្ងៃមកនេះមានការហក់ឡើងជាលំដាប់។

បើតាមសេចក្តីជូនដំណឹងរបស់រដ្ឋបាលខេត្តស្ទឹងត្រែងចុះថ្ងៃទី១១ សីហា បានអោយដឹងថា ស្ថានភាពជាក់ស្តែងនៃកម្រិតកម្ពស់ទឹកក្នុងមូលដ្ឋាននៃភូមិសាស្ត្រ ខេត្តស្ទឹងត្រែង នាពេលបច្ចុប្បន្នក្នុងរយៈពេលប៉ុន្មានថ្ងៃចុងក្រោយនេះ ស្ថានភាពអាកាសធាតុ និងការបន្តធ្លាក់ភ្លៀងគ្របដណ្តប់នៅទូទាំងប្រទេស រួមទាំងខេត្តស្ទឹងត្រែងផងដែរ ជាពិសេសនៅផ្នែខាងលើ​នៃទន្លេងមេគង្គ ទន្លេកុង ទន្លេសាន និងទន្លេ ស្រែពក កម្ពស់ទឹកមានការកើនឡើងជាលំដាប់។

រដ្ឋបាលខេត្តស្ទឹងត្រែង បានធ្វើការដាស់តឿនដល់សាធារណជន និងបងប្អូនប្រជាពលរដ្ឋទាំងអស់ ដែលកំពុងរស់នៅ និងប្រកបមុខរបរតាមបណ្ដោយដងទន្លេទាំងបួនខាងលើ និងមូលដ្ឋានដែលងាយរងគ្រោះផ្សេងៗទៀត សូមមេត្តាមានការត្រៀមបង្ការ និងប្រុងប្រយ័ត្នខ្ពស់ដោយហេតុថា អាចនឹងមានជំនន់ទឹកភ្លៀង និងការកើនឡើងកម្ពស់ទឹកទន្លេបណ្តាលឱ្យទឹកជំនន់កើតមានឡើងនៅតាមមូលដ្ឋានមួយចំនួនជាយថាហេតុ។

រដ្ឋបាលខេត្តស្ទឹងត្រែងក៏បានជម្រាបជូនផងដែរថា ក្នុងករណីចាំបាច់ណាមួយចំពោះគ្រោះអាសន្នកើតមានឡើងក្នុងមូលដ្ឋាន សូមបងប្អូនប្រជាពលរដ្ឋផ្ដល់ព័ត៌មានបន្ទាន់ដល់ថ្នាក់ដឹកនាំភូមិ និងអាជ្ញាធរមូលដ្ឋានឃុំ សង្កាត់ដើម្បីជួយ​ដោះស្រាយ និងអន្តរាគមន៍បានទាន់ពេលវេលា និងបញ្ចៀសបាននូវហានិភ័យធ្ងន់ធ្ងរ។

យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ស្តីពីស្ថានភាពធាតុអាកាស និងការព្យាករណ៍កម្ពស់ទឹក ក៏ដូចជាស្ថានភាពជាក់ស្ដែងនៃកម្រិតកម្ពស់ទឹកក្នុងមូលដ្ឋាននៃភូមិសាស្ត្រ ខេត្តស្ទឹងត្រែង នាពេលបច្ចុប្បន្ននេះ គណៈកម្មាធិការគ្រប់គ្រងគ្រោះមហន្តរាយខេត្ត សូមយកឱកាសនេះ ជម្រាបជូនដំណឹងដល់សាធារណជន និងបងប្អូនប្រជាពលរដ្ឋទាំងអស់មេត្តាជ្រាបថា ក្នុងរយៈពេលប៉ុន្មានថ្ងៃចុងក្រោយនេះ ស្ថានភាពអាកាសធាតុ និងការបន្តធ្លាក់ភ្លៀងគ្របដណ្តប់នៅទូទាំងប្រទេស រួមទាំងខេត្តស្ទឹងត្រែងយើងផងដែរ ជាពិសេសនៅផ្នែកខាងលើនៃទន្លេងមេគង្គ ទន្លេកុង ទន្លេសាន និងទន្ល ស្រែពក៕

អត្ថបទ៖ សំអឿន