ព័ត៌មានជាតិ

កម្ពុជា ត្រូវការថវិកាជាង ៤០ លានដុល្លារ ដើម្បីអភិរក្សសត្វដំរីអាស៊ីរយៈពេល ១០ ឆ្នាំខាងមុខ

បានផុស

៣ years មុន

នៅ

ថ្ងៃសុក្រ ១២ សីហា ២០២២

ដោយ

នៅក្នុងរយៈពេល ១០ ឆ្នាំខាងមុខ ប្រទេសកម្ពុជាមានតម្រូវការថវិកាប្រមាណជាង ៤០ លានដុល្លារអាមេរិក ដើម្បីអភិរក្សសត្វដំរីព្រៃអាស៊ីនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសយុទ្ធនាការអន្ទាក់សូន្យនៅខេត្តកំពង់ធំ និងអបអរសាទរទិវាដំរីពិភពលោក នៅថ្ងៃទី ១២ ខែសីហានេះ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានមានប្រសាសន៍ថា តាមការប៉ាន់ស្មានផែនការសកម្មភាពរយៈពេល ១០ ឆ្នាំ ដើម្បីអភិរក្សសត្វដំរីព្រៃអាស៊ីនៅកម្ពុជា គឺត្រូវការថវិកាចំនួន ៤០,៥ លានដុល្លារអាមេរិក ដែលគម្រោងថវិកាទាំងនេះរំពឹងថា នឹងបានមកពីប្រភពរួមបញ្ចូលគ្នាទាំងកញ្ចប់ថវិការាជរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍នានា។

លោក បានបន្តថា រាជរដ្ឋាភិបាលកម្ពុជាតាមរយៈក្រសួងបរិស្ថាន ជាមួយអង្គការដៃគូ បានខិតខំរៀបចំផែនការសកម្មភាពដើម្បីអភិរក្សសត្វដំរីអាស៊ី ដោយនៅក្នុងរយៈពេល ១០ ឆ្នាំ គិតចាប់ពីឆ្នាំឆ្នាំ២០២០ ដល់ឆ្នាំ ២០២៩ ដោយបានកំណត់នូវបញ្ហាអាទិភាពចំនួន ៧ ក្នុងនោះរួមមានទី១. ការកាត់បន្ថយការបាត់បង់ទីជម្រក, ទី២. អភិរក្សនិងតភ្ជាប់ច្រករបៀង និងហ្វូងដំរីព្រៃឡើងវិញ, ទី៣. ពង្រឹងការអនុវត្តច្បាប់, ទី៤. បង្ការមិនឱ្យមានការចាប់ដំរីព្រៃមកចិញ្ចឹម, ទី៥. បន្ធូរបន្ថយជម្លោះរវាងសត្វដំរីព្រៃ និងមនុស្ស, ទី៦. អប់រំផ្សព្វផ្សាយ និងទី៧. សិក្សាស្រាវជ្រាវនិងតាមដានត្រួតពិនិត្យចំនួនដំរីអាស៊ី។

លោកបានបន្តទៀតថា តាមរយៈផែនការសកម្មភាពនេះ ក្រសួងបរិស្ថាន និងអង្គការដៃគូ បានរកឃើញថា ដំរីចាប់ផ្តើមបង្ហាញវត្តមាននៅតំបន់មួយចំនួនឡើងវិញ ដូចជានៅតំបន់ដែនជម្រកសត្វព្រៃព្រៃឡង់ជាដើម។

គួរបញ្ជាក់ថា ចំនួនសត្វដំរីអាស៊ីនៅកម្ពុជា ត្រូវបានប៉ាន់ប្រមាណមានចន្លោះពី ៤០០ ទៅ ៦០០ ក្បាល នៅក្នុងតំបន់ការពារធម្មជាតិនៃប្រទេសកម្ពុជា ជាពិសេសនៅក្នុងតំបន់ជួរភ្នំក្រវ៉ាញ និងភាគឦសាន្ត។ ចំណែកដំរីស្រុកត្រូវបានប៉ាន់ស្មានថា មានប្រមាណជាង ៧០ ក្បាល៕

អត្ថបទ៖ សំអឿន