រដ្ឋបាលខេត្តកែប បើកវគ្គបណ្តុះបណ្តាលតម្រង់​ទិសក្រុមប្រឹក្សាឃុំ-សង្កាត់ ជាប់ឆ្នោតអាណត្តិទី៥

នៅព្រឹកថ្ងៃទី១៦ ខែសីហា ឆ្នាំ២០២២ រដ្ឋបាលខេត្តកែប​ បានរៀបចំសិក្ខាសាលាវគ្គបណ្តុះបណ្តាលតម្រង់ទិសក្រុមប្រឹក្សាឃុំ-សង្កាត់ ជាប់ឆ្នោតថ្មី អាណត្តិទី៥ ក្រោមអធិបតី​ភាព​លោកបណ្ឌិត​ សោម​ ពិសិដ្ឋ​ អភិបាល​ នៃគណអភិបាលខេត្ត​កែប ដោយមានការចួលរួមពីលោក​ លោកស្រីអភិបាលរងខេត្ត​ លោក​ លោកស្រីប្រធានមន្ទីរ​ អង្គភាព​ ជុំវិញខេត្ត​ លោកលោកស្រី​ក្រុមប្រឹក្សាឃុំសង្កាត់ដែលជាប់​ឆ្នោតថ្មី​ជាច្រើនរូបផងដែរ។

សូមបញ្ចាក់ផងដែរថា​ ទូទាំងខេត្តកែប​ មានសមាជិកក្រុមប្រឹក្សាឃុំសង្កាត់​សរុបចំនួន​៣១រូប​(​ ស្រី​ ០៦រូប)​ ក្នុងនោះមានសមាសភាពមកពីគណបក្សប្រជាជនចំនួន​២៩រូប​ និងគណបក្សភ្លើងទានចំនួន​០២រូប។ 

លោកបណ្ឌិត សោម ពិសិដ្ឋ អភិបាលខេត្ត​កែប បានលើកឡើងថា ចំពោះក្រុមប្រឹក្សាឃុំ សង្កាត់ ដែលទើបជាប់ឆ្នោតថ្មី គឺតម្រូវឱ្យចូលរួមក្នុងវគ្គបណ្តុះបណ្តាលតម្រង់ទិសសម្រាប់ក្រុមប្រឹក្សាឃុំ សង្កាត់ ក្នុងអាណត្តិថ្មីរបស់ខ្លួន ដើម្បីសម្រួលដល់ការងារនៅរដ្ឋបាលឃុំ សង្កាត់ឱ្យបានល្អប្រសើរ។​ ក្រុមប្រឹក្សា ឃុំ សង្កាត់ ត្រូវគោរពតាមតួនាទីភារកិច្ច និងបទដ្ឋានគតិយុត្តិ ដែលណែនាំសម្រាប់រដ្ឋបាលឃុំ សង្កាត់ យកទៅអនុវត្តឱ្យបានពេញលេញ និងត្រឹមត្រូវ​ទោះជាលោក លោកស្រី ដែលបានជាប់ឆ្នោតមកពីគណបក្សណាមួយក៏ដោយ ចាំបាច់លោក លោកស្រី ត្រូវប្រកាន់ភ្ជាប់នូវគោលនយោបាយសុខសន្តិភាព ដើម្បីជាប្រយោជន៍ដល់ប្រជាពលរដ្ឋនៅគ្រប់មូលដ្ឋាន។

លោកបណ្ឌិត​ បានបន្ថែមទៀតថា លោក លោកស្រី ត្រូវមានគណនេយ្យភាព ចំពោះប្រជាពលរដ្ឋ រាជរដ្ឋាភិបាលកម្ពុជា​ និងច្បាប់ ដែលបានប្រគល់សិទ្ធិអំណាច ធនធាន និងការសម្រេចចិត្តក្នុងកិច្ចការដឹកនាំ គ្រប់គ្រងចាត់ចែង និងសម្រេចចិត្តក្នុងការអភិវឌ្ឍន៍ជូនប្រជាពលរដ្ឋឱ្យបានល្អប្រសើរ។ ម្យ៉ាងវិញទៀតមុខងារ និងធនធានជាច្រើនត្រូវបានប្រគល់មករដ្ឋបាលថ្នាក់ក្រោមជាតិសម្រាប់រដ្ឋបាលរាជធានី ខេត្ត ក្រុង ស្រុក និងឃុំ សង្កាត់ ក្នុងការបំពេញការងារជូនប្រជាពលរដ្ឋ ជាពិសេសការផ្តល់សេវាសាធាណៈអោយទាន់ពេលវេលា និងរហ័សនៅកម្រិតរដ្ឋបាលនីមួយៗ​ ជាពិសេសរដ្ឋបាលឃុំ​ សង្កាត់​ ដែលនៅជិតបងប្អូន​ប្រជាពលរដ្ឋបំផុត។ 

លោកបានបន្តថា វគ្គបណ្តុះបណ្តាលតម្រង់ទិសដែលរៀបចំដោយសាលាជាតិរដ្ឋបាលមូលដ្ឋាននៃក្រសួងមហាផ្ទៃនេះ ពិតជាមានសារៈសំខាន់ណាស់សម្រាប់លោក លោកស្រី ជាសមាជិកសមាជិកា ក្រុមប្រឹក្សាឃុំ សង្កាត់ ដែលទើបនឹងជាប់ឆ្នោតថ្មី ក្នុងអាណត្តិទី៥នេះ ។ ដូចនេះសូមលោក លោកស្រី ត្រូវយកចិត្តទុកដាក់ស្តាប់គ្រូឧទ្ទេស ដើម្បីជាពុទ្ធិ ក្នុងការអនុវត្តការងារនៅរដ្ឋបាលរបស់ខ្លួន ប្រកបដោយឆន្ទៈ ការគោរពនូវតួននាទី ភារកិច្ច ឱ្យបានល្អប្រសើរ៕

អត្ថបទ៖ សេង ណារិទ្ធ