រដ្ឋមន្ត្រីការងារ ស្នើពិភាក្សាឲ្យបានគ្រប់ជ្រុងជ្រោយលើសេចក្តីព្រាងអនុក្រឹត្យស្ដីពីតួនាទី និងភារកិច្ចរបស់អធិការកិច្ចសន្តិសុខសង្គម

លោកបណ្ឌិត អ៊ិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ បានស្នើឱ្យដល់សមាជិកក្រុមប្រឹក្សាភិបាលនៃ ប.ស.ស.ទាំងអស់ត្រូវត្រួតពិនិត្យ និងពិភាក្សាឲ្យបានគ្រប់ជ្រុងជ្រោយទៅលើសេចក្តីព្រាង​អនុក្រឹត្យស្ដីពីតួនាទី និងភារកិច្ចរបស់អធិការកិច្ចសន្តិសុខសង្គម នៃប.ស.ស.ដើម្បីប្រមូលបាននូវធាតុចូលសំខាន់ៗបន្ថែមទៀតសំដៅធ្វើឲ្យសេចក្តីព្រាងអនុក្រឹត្យនេះ កាន់តែមានលក្ខណៈត្រឹមត្រូវស្របទៅ​តាមច្បាប់​ស្តីពីរបបសន្តិសុខសង្គមដោយធ្វើយ៉ាងណាធានាបាននូវប្រសិទ្ធភាព តម្លាភាព និងគណនេយ្យភាព។

នៅក្នុងកិច្ចប្រជុំលើកទី១៤ អាណត្តិទី១ របស់ខ្លួនដើម្បីត្រួតពិនិត្យ និងពិភាក្សាលើរបៀបវារៈសំខាន់ៗចំនួន២ នាព្រឹកថ្ងៃទី១៧សីហានេះ លោករដ្ឋមន្ត្រីក៏បានស្នើដល់សមាជិកក្រុមប្រឹក្សាភិបាលទាំងអស់ ត្រូវពិនិត្យ​និងពិភាក្សាឲ្យបានគ្រប់ជ្រុងជ្រោយផងដែរនូវសេចក្តីព្រាងផែនការថវិកាធ្វើយ៉ាងណាឲ្យការចំណាយនានាក្នុងការអនុវត្តការងារស្របទៅតាមគោលការណ៍របស់រាជរដ្ឋាភិបាល និងធានាបាននូវតុល្យភាពហិរញ្ញវត្ថុ ។

ក្នុងកិច្ចប្រជុំនេះដែរ លោករដ្ឋមន្ត្រីក៏បានធ្វើការកោតសរសើរយ៉ាងស្មោះចំពោះការខិតខំប្រឹងប្រែងសហការបានយ៉ាងល្អរបស់សមាជិកទាំងអស់នៃក្រុមប្រឹក្សាភិបាល ប.ស.ស. ក៏ដូចជាថ្នាក់ដឹកនាំមន្រ្តីបុគ្គលិកគ្រប់លំដាប់​ថ្នាក់របស់ ប.ស.ស. ដែលបានខិតខំយកចិត្តទុកដាក់ប្រកបដោយស្មារតីទទួលខុសត្រូវខ្ពស់ក្នុងការអនុវត្តការងារកន្លងមកបើទោះបីស្ថិតក្នុងស្ថានភាពដ៏លំបាកយ៉ាងណាក្ដី​ក៏នៅតែបំពេញតួនាទីយ៉ាងល្អ​ក្នុងការផ្ដល់សេវា​សាធារណៈប្រកបដោយភាពទន់ភ្លន់ក្រមសីលធម៌ មនសិការវិជ្ជាជីវៈ និងមានស្មារតីទទួលខុសត្រូវខ្ពស់៕

អត្ថបទ៖ សំអឿន