​ក្រសួងការងារ​នឹងចុះដោះស្រាយ​បើកប្រាក់ឈ្នួល​ជូនកម្មករ៤០០នាក់​ដែលត្រូវថៅកែរត់​ចោល​នាពេល​ឆាប់ៗនេះ

​ក្រសួងការងារ និងបណ្តុះបណ្តាលវិជ្ជាជីវៈនឹងចុះដោះស្រាយ​បើកប្រាក់ឈ្មួលជូនដល់កម្មករ​និយោ​ជិតប្រមាណ៤០០នាក់នៃក្រុមហ៊ុន ឃែនធើរេន អឺភែរឹល ដែលថៅកែរត់ចោលមិន​បើកប្រាក់ឈ្នួល​នាពេលឆាប់ៗនេះ។

​ការចុះដោះស្រាយបើកប្រាក់ឈ្មួលជូនដល់កម្មករនេះបានធ្វើឡើងបន្ទាប់ពីសម្ដេចតេជោ ហ៊ុន សែន ​នាយករដ្ឋមន្ត្រីនៃកម្ពុជាបានចេញបញ្ជាឱ្យរដ្ឋមន្ត្រីក្រសួងការងារដោះស្រាយ​បញ្ហា និងបើកប្រាក់​ឈ្នួលជូនកម្មករឱ្យបានគ្រប់គ្នាដោយខ្ចីថវិកាពីរាជរដ្ឋាភិបាលដើម្បីយកទៅបើកប្រាក់​ឈ្នួលជូន​កម្មករជា​មុនសិនហើយចាត់វិធានការដោះស្រាយជាមួយថៅកែរោងចក្រតាមក្រោយ។

​ក្រសួងនឹងរៀបចំការទូទាត់បើកប្រាក់ឈ្នួល​ និងប្រាក់អត្ថប្រយោជន៍ផ្សេងទៀត​ជូនកម្មករ​និយោជិត​ចំនួន៣ចំណុច ដោយប្រើថវិកាបុរេប្រទានរបស់រាជរដ្ឋាភិបាលក្នុងនោះមានប្រាក់ឈ្នួល​ខែចុង​ក្រោយ​ដែលមិនទាន់បានបើកប្រាក់បំណាច់ជួសការឈប់សម្រាកប្រចាំឆ្នាំដែលនៅសល់ ប្រាក់បំ​ណាច់អតីតភាពការងារថ្មីក្នុងឆ្នាំ និងប្រាក់រំលឹកប្រាក់បំណាច់អតីតភាពការងារ​ដែលមាន​មុនឆ្នាំ​២០១៩។

​ជាមួយគ្នានេះដែរ​ក្រសួងបានណែនាំឱ្យកម្មករ​និយោជិតត្រៀមឯកសារពាក់ព័ន្ធមួយចំនួន​ និងសូម​រង់ចាំការជូនដំណឹងឱ្យមកបើកប្រាក់ឈ្នួលនាពេលខាងមុខឆាប់ៗនេះ។​

​ឯកសារដែលត្រូវត្រៀមនោះ ​ទី១. បណ្ណសម្គាល់ខ្លួនកម្មករនិយោជិត (ច្បាប់ដើម) ឬកិច្ចសន្យាការងារ និងសៀវភៅការងារកម្មករនិយោជិត ឬបណ្ណបេឡាជាតិរបបសន្តិសុខសង្គម ឬអត្តសញ្ញាណ​បណ្ណ​សញ្ជាតិខ្មែរ ឬលិខិតឆ្លងដែន និងទី២. បណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ (បើមាន)។

​ក្រសួងការងារបានណែនាំទៀតថា​ក្នុងកំឡុងពេលនៃការរង់ចាំការជូនដំណឹងបន្ថែមនេះ ​សូមកម្មករ​និយោ​ជិតដាក់ពាក្យស្វែងរកការងារធ្វើ តាមរយៈទីភ្នាក់ងារជាតិមុខរបរ និងការងារដើម្បី​រក្សាស្ថិរភាព​នៃប្រាក់ចំណូល។

​គួរបញ្ជាក់ថា ក្រុមហ៊ុន ឃែនធើរេន អឺភែរឹលដែលថៅកែរត់ចោលមិនបើកប្រាក់​ឈ្នួលជូនកម្មករ​និយោជិតដោយសារក្រុមហ៊ុនក្ស័យធនមានទីតាំងស្ថិតនៅភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យរាជអានីភ្នំពេញ៕

អត្ថបទ៖ សំអឿន