ពលរដ្ឋនៅភូមិអូរអណ្តូង ១ សោកស្តាយក្រោយអាជ្ញាធរជីកផ្លូវបេតុងល្អស្អាត ដើម្បីដាក់លូបង្ហូរទឹក

ប្រជាពលរដ្ឋ រស់នៅភូមិអូរអណ្តូង ១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ មានការសោកស្តាយក្រោយផ្លូវចាក់ក្រាលបេតុងដ៏រលោងស្រឹល បែរជាត្រូវជីកកកាយដាក់លូបង្ហូរទឹកទៅវិញ។

យោងតាមប្រភពពីប្រជាពលរដ្ឋ រស់នៅសង្កាត់ព្រែកប្រា បានឲ្យដឹងថា ពួកគាត់សោកស្ដាយ ដែលផ្លូវបេតុងដ៏ល្អស្អាត បែរជាត្រូវជីកកកាយដាក់លូបង្ហូរទឹកទៅវិញ។ ពួកគាត់ លើកឡើងថា ចុះពីមុនពេលស្ថាបនាផ្លូវម្តេច មិនដាក់លូបង្ហូរទឹកក្រោមផ្លូវជាមុនសិន ចាំបាច់ធ្វើផ្លូវហើយ បែរជាត្រូវជីកដាក់លូទៅវិញទៀត។

ទាក់ទងនឹងបញ្ហាជីកផ្លូវ ដាក់ប្រពន្ធ័លូលើផ្លូវបេតុង ក្នុងភូមិអូរអណ្តូង ១ខាងលើនេះ លោក គុយ គឹមហ៊ាង ប្រធានការិយាល័យសាធារណៈការ សាលាខណ្ឌច្បារអំពៅ បានប្រាប់កម្ពុជាថ្មី នៅថ្ងៃទី ១៩ ខែសីហានេះថា មូលហេតុដែលអាជ្ញាធរសម្រេច ជីកកាត់ផ្លូវបេតុងដាក់ប្រពន្ធ័លូថ្មីនេះ ដោយសារតែលំនៅដ្ឋានប្រជាពលរដ្ឋរាប់ពាន់គ្រួសារ រងការលិចលង់ព្រោះតែគ្មានប្រពន្ធ័លូបង្ហូរទឹក ជាពិសេសអ្នករស់នៅក្នុងបុរី ដែលឈ្មួញសាងសង់ផ្ទះលក់ មិនបានគិតឲ្យបានដិតដល់ ពីការខ្វះប្រពន្ធ័លូបង្ហូរទឹកនោះ។ដូច្នេះហើយ អាជ្ញាធរត្រូវសម្រេចចិត្តជីកកាត់ផ្លូវបេតុង ដើម្បីដាក់លូបង្ហូរទឹក។

ក្នុងនោះលោក គុយ គឹមហ៊ាង ក៏ស្នើដល់ម្ចាស់បុរីទាំងឡាយ ដែលសាងសង់ផ្ទះសម្រាប់លក់គួរគិតពីបញ្ហាលូបង្ហូរទឹកផង កុំចេះតែប្រមូលលុយច្រកក្នុងហោប៉ៅ ដោយមិនគិតពីផលលំបាកដល់អតិថិជនដែលទិញផ្ទះពីក្រុមហ៊ុនរបស់ខ្លួននោះ ដោយទីបំផុតធ្លាក់មកលើអាជ្ញាធរជាអ្នកដោះស្រាយទៅវិញ៕

អត្ថបទ៖ នរា