ក្រសួងអប់រំ៖ ការបង្កើតដេប៉ាតឺម៉ង់ភា​សា​វៀតណាម មិនមែនសម្រាប់សិស្សទូទៅ គឺសម្រាប់សិស្សអាហារូបករណ៍ និងអ្នកឯកទេស

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានថ្លែង ក្នុងសន្និសីទសារព័ត៌មានកាលពេលល្ងាចថ្ងៃទី១៩ ខែសីហា ឆ្នាំ២០២២ ថា ការបង្កើតដេប៉ាតឺម៉ង់ភាសាវៀតណាម ក្នុងសាកលវិទ្យាល័យភូមិន្ទភ្នំពេញនេះ នឹងជួយបណ្តុះបណ្តាលភាសាវៀតណាមដល់និស្សិតអារូបករណ៍ខ្មែររយៈពេលមួយឆ្នាំពេញមុននឹងចេញទៅវៀតណាម។

បណ្ឌិតសភាចារ្យ ហង់ជួន ណារ៉ុន បានលើកឡើងថា ការបង្កើតដេប៉ាតឺម៉ង់វៀតណាមនេះ នឹងជួយបណ្តុះបណ្តាលភាសាវៀតណាមដល់និស្សិតដែលទទួលបានអាហារូបករណ៍ទៅវៀតណាម ឱ្យរៀនភាសាវៀតណាមមួយឆ្នាំពេញនៅកម្ពុជា មុននឹងបន្តដំណើរទៅសិក្សានៅទីនោះ។ កន្លងមក ពួកគេមានឱកាសរៀនភាសាវៀតណាមត្រឹមតែ៣ខែដំបូងប៉ុណ្ណោះ រួចទៅចូលរៀនជាមួយសិស្សវៀតណាមដែលកត្តានេះ បានផ្តល់ផលពិបាក ខណៈនិស្សិតកម្ពុជាដែលទទួលបានអាហារូបករណ៍ថ្នាក់បរិញ្ញាបត្រ និងថ្នាក់បណ្ឌិតនាពេលកន្លងទៅ មានជាង១០០នាក់ ក្នុងមួយឆ្នាំៗ។

ការបណ្តុះបណ្តាលភាសាវៀតណាមនេះ មិនមែនសម្រាប់បណ្តុះបណ្តាលដល់សិស្សទូទៅឡើយ គឺក្រសួងផ្តោតការបណ្តុះបណ្តាលភាសាវៀតណាមដល់អ្នកឯកទេសដែលត្រូវទៅធ្វើការនៅទីនោះ ក៏ដូចជាអ្នកការទូត អ្នកធ្វើការឯកជន ដែលត្រូវការប្រើប្រាស់ភាសាវៀតណាម។ នេះបើតាមការលើកឡើងរបស់លោករដ្ឋមន្ត្រី ហង់ជួន ណារ៉ុន។

បើតាមលោកបណ្ឌិត ហង់ជូន ណារ៉ុន ការបង្កើតភាសាវៀតណាម ដើម្បីបណ្តុះបណ្តាលលើមុខជំនាញទាំងនេះ នឹងជួយបង្កើនការងារដល់ប្រជាជនកម្ពុជាដែលរស់នៅជាប់ព្រំដែនវៀតណាមតាមរយៈវិស័យទេសចរណ៍ ការអភិវឌ្ឍនៅទីនោះ ហើយក៏មានការដាក់វិនិយោគទុនរបស់វៀតណាមមកកាន់កម្ពុជាកាន់តែច្រើនបន្ថែមទៀត ស្របពេលដែលវៀតណាម ជាដៃគូនាំចេញនាំចូលពាណិជ្ជកម្មធំជាងគេរបស់កម្ពុជាក្នុងទឹកប្រាក់ជាង ៥,០០០លានដុល្លារ ជាពិសេស ក្នុងបរិបទកូវីដ-១៩ ក៏មានការកើនឡើងបន្ថែមទៀត។ ​

មិនត្រឹមតែប៉ុណ្ណោះ រដ្ឋមន្ត្រីក្រសួងអប់រំរូបនេះ ក៏បានក្រើនរំឭកថា ក្នុងសាកលវិទ្យាល័យភូមិន្ទភ្នំពេញ ក៏កំពុងមានថ្នាក់បណ្តុះបណ្តាលថ្នាក់បរិញ្ញាបត្រ និងថ្នាក់បណ្ឌិត ផ្នែកភាសាអង់គ្លេស បារាំង ជប៉ុន ចិន កូរ៉េ និងថៃផងដែរ។ យ៉ាង​ណា​មិញ ក្រសួង ក៏នឹងមានគម្រោងបង្កើតដេប៉ាតឺម៉ង់ភាសាដទៃទៀតក្រៅពីភាសាវៀតណាម ក្នុងបណ្តាលប្រទេសជាសមាជិកអាស៊ាន​នាពេលអនាគត ដើម្បីងាយស្រួលក្នុងការទំនាក់ទំនងការងាររវាងគ្នានឹងគ្នា៕

ដោយ៖ អុន ស្រីមាន