អគ្គិសនីកម្ពុជា បញ្ជាក់មូលហេតុបណ្តាល​ឱ្យដាច់ភ្លើងនៅរាជធានីភ្នំពេញ​ និងខេត្តមួយចំនួន

ភ្នំពេញ៖ នៅក្នុងរាជធានីភ្នំពេញ និងខេត្តមួយចំនួន នារាត្រីទៀបភ្លឺឆ្លងចូលថ្ងៃទី២១ សីហា ឆ្នាំ២០២២នេះ បានដាច់ចរន្តអគ្គិសនីប្រមាណជាងមួយម៉ោង បណ្តាលឱ្យបណ្តាញទឹកស្អាត ក៏ត្រូវបានដាច់។

ឆ្លើយតបនឹងការដាច់ចរន្តអគ្គិសនីនេះ អគ្គិសនីកម្ពុជា (EDC) បានបញ្ជាក់តាមរយៈសេចក្តីប្រកាសថា វេលាម៉ោង០៣:៤៩នាទីទៀបភ្លឺ ទី២១ ខែសីហា ឆ្នាំ២០២២ មានករណីលោតឌីស្យុងទ័រទ្វារចរន្តតង់ស្យុងខ្ពស់ ២៣០ គីឡូវ៉ុល ដែលបណ្តាលឲ្យដាច់ចរន្តអគ្គិសនីនៅតំបន់មួយចំនួនដែលស្ថិតនៅក្នុងរាជធានីភ្នំពេញ និងតាមបណ្ដាខេត្ត​មួយចំនួន។ ក្រុមការងារបច្ចេកទេសកំពុងធ្វើការពិនិត្យ ដើម្បីស្ដារប្រព័ន្ធ និងភ្ជាប់ចរន្តអគ្គិសនី​ជូនអតិថិជនឲ្យឆាប់មានចរន្តអគ្គិសនីប្រើប្រាស់ឡើងវិញ នៅពេលទទួលបានព័ត៌មានបន្ថែម​ពីការដាច់​ចរន្តអគ្គិសនីនេះ ក្រុមការងារនឹងជូនដំណឹងជាបន្តបន្ទាប់ទៀត។ អត្ថបទ៖ ស្រីរ័ត្ន