ទឹកហូរគួចយុវជនម្នាក់នៅចំណុចស្ពានយោលតាតោកទៅបាត់សមត្ថកិច្ចរកមិនទាន់ឃើញ

តាមសេចក្តីរាយការណ៍ បានឱ្យដឹងថា នៅវេលាម៉ោងប្រមាណជា១១:៣០នាទីព្រឹក ថ្ងៃទី ២១ ខែ សីហា មានប្រជាពលរដ្ឋ២នាក់ម្នាក់ឈ្មោះ ប៊ូ ផល្លា(រួចផុតពីគ្រោះថ្នាក់)  និងម្នាក់ទៀតឈ្មោះ វុធ វង់ អាយុ២១ឆ្នាំ ជាកូនប្រុសគ្រួសារខាងលើកំពុងបាត់ខ្លួននៅចំណុចស្ពានយោលតាតោក TU(64513-80636) ស្ថិតនៅភូមិតាតោក ឃុំតាតោក ស្រុកសំឡូត ខេត្តបាត់ដំបង ដោយសារតែទឹកមានសភាពហូរខ្លាំងបណ្ដាលឲ្យគួចក្បូនក្រឡាប់​នៅពេលធ្វើដំណើរធ្លាក់ចូលទៅក្នុងទឹក។

នៅក្នុងឧបទ្ទវហេតុនេះ យុវជនឈ្មោះ ប៊ូ ផល្លា  បានស្រវ៉ាតោងប៊ីដុងក្បូនជាប់រួចផុតគ្រោះថ្នាក់ ចំណែកឯយុវជនម្នាក់ទៀត ឈ្មោះ វុធ វង់ ធ្លាក់ចូលទឹកគួបផ្សំជាមួយសម្លៀកបំពាក់ក្រាស់ធ្ងន់ផង បណ្ដាលឲ្យផុតដៃផុតជើង ហូរតាមទឹកលិចបាត់រកមិនទាន់ឃើញ។

កម្លាំងអន្ដរាគមន៍កង៥០២ សហការជាមួយកម្លាំងអន្ដរាគមន៍កងពលតូចថ្មើរជើងលេខ៥២ ផ្នែកសឹករងស្រុក សំឡូត នគរបាលការពារព្រំដែនលេខ៣១០ នគរបាលប៉ុស្ដិ៍រដ្ឋបាលឃុំតាតោក និងពលរដ្ឋសរុប ប្រមាណ៤០នាក់ កំពុងស្វែងអ្នកបាត់ខ្លួន៕