លោក ទៀ វិចិត្រ ប្រកាសតាមរកមុខ«ជនឆបោកដែលថាលោកជំពាក់លុយពួកគេ»ឲ្យទាល់តែឃើញ

លោកឧកញ៉ា ទៀ វិចិត្រ ក្មួយប្រុសបង្កើតរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិកម្ពុជា បានប្រកាសថា នឹងតាមវែករកមុខឲ្យទាល់តែឃើញនូវជនឆបោកដែលបង្ហោះសារទារលុយពីលោកដោយចោទថា លោកបានជំពាក់លុយពួកគេ។ លោកបានប្រកាសបែបនេះនៅលើទំព័រហ្វេសប៊ុករបស់លោកនៅព្រឹកថ្ងៃចន្ទនេះ។

លោកឧកញ៉ា ទៀ វិចិត្រ បានសរសេរលើហ្វេសប៊ុកយ៉ាងដូច្នេះថា៖ «មិនគួរឲ្យមាននៅក្នុងសង្គមយើងនោះទេ ខ្ញុំដាច់ខាតនឹងតាមរឿងនេះឲ្យដឹងមុខពិតរបស់ជនខិលខូចមួយនេះ !!»។ ការប្រកាសរបស់លោកឧកញ៉ា ទៀ វិចិត្រ នេះ ធ្វើឡើងបន្ទាប់ពីរូបលោកត្រូវបានគណនីហ្វេសប៊ុកមួយឈ្មោះ Chhey Lii  បានបង្ហោះសារជាសាធារណៈ ដើម្បីទារលុយជំពាក់ពួកគេទាំងដែលលោកមិនដែលស្គាល់ និងមិនបានជាប់ពាក់ព័ន្ធនឹងរឿងជំពាក់លុយនោះទាល់តែសោះ។

ដោយភ្ជាប់ជាមួយរូបភាពលោកឧកញ៉ា ទៀ វិចិត្រ គណនីហ្វេសប៊ុកនោះ បានសរសេរថា៖ «សូមអញ្ជើញលោក ទៀ វិចិត្រ ចូលខ្លួនមកដោះស្រាយបំណុលជូនក្រុមហ៊ុនជាបន្ទាន់ បើមិនចង់ខ្មាសគេជាងនេះ កុំចង់ខ្លាំងជាមួយក្រុមហ៊ុនចិន«។ ជាមួយនឹងការសរសេរបែបនេះ គណនីហ្វេសប៊ុកនេះ ក៏បានបង្ហាញលេខកុងគណនីABA ពីរខ្សែ ដើម្បីឲ្យលោកផ្ទេរលុយទៅឲ្យពួកគេថែមទៀត។ ដោយហួសចិត្តនឹងការសរសេរបែបនេះ លោកទៀ វិចិត្រ ក៏បានចូលទៅសរសេរComment តបថា៖ «ចុម ធ្វើអញ្ជឹងបានទៀត?»។

ជាការកត់សម្គាល់ បញ្ហាចោទជំពាក់លុយ ហើយយករូបភាពគេទៅបង្ហោះទារលុយជាសសាធារណៈទាំងម្ចាស់ខ្លួនមិនបានដឹងបែបនេះ មិនមែនកើតឡើងតែលោកឧកញ៉ា ទៀ វិចិត្រ តែម្នាក់នោះទេ។ កន្លងមកថ្មីៗនេះ ក៏ដូចពេលបច្ចុប្បន្ននេះ ក៏មានអ្នកលេងបណ្តាញសង្គមហ្វេសប៊ុកមួយចំនួនជួបញ្ហាដូចគ្នានេះផងដែរ។ ពួកគេខ្លះ ត្រូវបានជនឆបោកនេះ ចោទថាជំពាក់លុយពួកគេប៉ុណ្ណេះ ប៉ុណ្ណោះ និងគំរាមបង្ហោះបង្ហាញរូបផ្សេងៗថែមទៀត បើសិនមិនសងលុយដល់ពួកគេ៕

ដោយ៖ វណ្ណ សុគន្ធា