នាយឧត្តមសេនីយ៍ វង្ស ពិសេន ស្នើទៅសម្តេច ទៀ បាញ់ លុបឈ្មោះ សាន ប៊ុនធឿន និងហ៊ត ប៉ូ ចេញពីកងទ័ព

លោកនាយឧត្ដមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នៅព្រឹកថ្ងៃចន្ទនេះ បានធ្វើសំណើ ២ ដាច់ដោយឡែកពីគ្នាទៅកាន់សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ដើម្បីស្នើសុំដាក់ឈ្មោះលោក សាន ប៊ុនធឿន និងលោក ហ៊ត ប៉ូ ចេញពីក្របខណ្ឌកងយោធពលខេមរភូមិន្ទ។ ការស្នើនេះ ធ្វើឡើងក្រោយសម្តេចតេជោ ហ៊ុន សែន បានចារយល់ព្រមលើសំណើរបស់បញ្ជាការដ្ឋានអង្គរក្សឲ្យដកបុគ្គលទាំង២នាក់នេះ។

តាមលិខិតស្នើសុំនេះ លោកនាយឧត្ដមសេនីយ៍ វង្ស ពិសេន បានជម្រាបប្រាប់សម្តេចពិជ័យសេ​នាថា មូលហេតុនៃការស្នើលុបឈ្មោះបុគ្គលទាំង២នាក់នេះ គឺដោយសារតែពួកគេបានធ្វើឲ្យប៉ះពាល់ដល់វិន័យ និងកិត្តិយសរបស់កងយោធពលខេមរភូមិន្ទយ៉ាងធ្ងន់ធ្ងរ។

គួររំលឹកថា ការស្នើសុំលុបឈ្មោះនេះ ធ្វើឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រតិកម្មខ្លាំងៗ និងបានបញ្ជាឲ្យលុបឈ្មោះលោក សាន ប៊ុនធឿន ចេញក្របខណ្ឌកងទ័ព។ នេះ គឺដោយសារតែលោក សាន ប៊ុនធឿន បានផ្សាយផ្ទាល់លើទំព័រហ្វេសប៊ុកទាំងស្រវឹង ហើយជេរគេជេរឯង និងបោកចានថែមទៀតក្នុងពេលកំពុងផ្សាយផ្ទាល់នោះ។

តាមរយៈទំព័រហ្វេសប៊ុក សម្តេចតេជោ បានសរសេរថា៖ «ចរិតពាលរបស់សាន ប៊ុនធឿន ប្រាកដជាមិនអាចកែប្រែបានឡើយ។ ដើម្បីជួយដល់សាន ប៊ុនធឿននិងប្រពន្ធកូន ខ្ញុំ និងភរិយាបានជួយលុយ ដើម្បីសាន ប៊ុនធឿន ទិញផ្ទះនៅ ថែមទាំងផ្តល់លុយជូន សាន ប៊ុនធឿន ៥០០ដុល្លារក្នុងមួយខែតាំងពីឆ្នាំ២០១៨មក។ ខ្ញុំធ្លាប់បានអប់រំសាន ប៊ុនធឿន កុំឱ្យស៊ីផឹកជេរបញ្ចោរ តែចរិតមនុស្សនេះកែមិនឡើងឡើយ។ ដើម្បីជៀសវាងនូវការយល់ច្រឡំណាមួយកើតឡើង ថ្ងៃនេះ ខ្ញុំបានបញ្ជាឱ្យមេបញ្ជាការអង្គរក្សស្នើសុំបណ្តេញ សាន ប៊ុនធឿនចេញពីក្របខណ័្ឌកងទ័ព»៕

ដោយ៖ វណ្ណ សុគន្ធា