ព័ត៌មានជាតិ

Update៖ ករណីជនល្មើសយកញញួរបំផ្លាញទីសក្ការព្រះអង្គដងកើ សំណុំរឿងដល់ណាហើយ?

បានផុស

៤ years មុន

នៅ

ថ្ងៃសៅរ៍ ២៦ ធ្នូ ២០២០

ដោយ

ភ្នំពេញ៖ អាជ្ញាធរនិងសមត្ថកិច្ចខណ្ឌដូនពេញបានបញ្ជាក់ថា ជនសង្ស័យដែលវាយបំផ្លិចបំផ្លាញទីសក្ការព្រះអង្គដងកើបណ្តាលឲ្យខូចខាតនោះ កំពុងឃុំខ្លួននៅពន្ធនាគារព្រៃស រង់ចាំការកាត់ទោស។ ចំណែកឯហត្ថាខាងស្ដាំព្រះអង្គដងកើ ដែលរងការខូចខាត ត្រូវបានខាងគណៈកម្មការបុណ្យជាតិព្រះបរមរាជវាំងចាត់ចែងជួសជុលភ្លាមៗឡើងវិញ ដើម្បីឲ្យពលរដ្ឋ្មានជំនឿ អាចគោរពបូជាឡើងវិញ។

ហេតុការណ៍ការចូលវាយបំផ្លាញទីសក្ការព្រះអង្គដង្កើ បានបង្កការភ្ញាក់ផ្អើលកាលពីវេលាម៉ោង ២និង៣០នាទីរសៀល ថ្ងៃទី២៥ ខែវិច្ឆិកា ឆ្នាំ២០២០ ក្រោយបុរសម្នាក់មិនដឹងកើតអី បានយកញញួរចូលទៅវាយបំផ្លាញរូបសំណាកព្រះអង្គដងកើបណ្តាលឱ្យប្រេះស្រាំព្រះហត្ថាខាងស្តាំទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចខណ្ឌដូនពេញបានឃាត់ខ្លួនជនសង្ស័យឈ្មោះ ឡោ គឹមសួ ភេទប្រុស អាយុ២៧ឆ្នាំស្នាក់នៅមិនពិតប្រាកដ។

បើតាមប្រភពព័ត៌មានបានអោយដឹងថា នៅមុនពេលកើតហេតុ បុរសជាជនល្មើសទំនងជាប្រើប្រាស់គ្រឿងញៀនបានដើរមកព្រះអង្គដងកើ ហើយឈរខាងក្រៅបង្អួចលើកដៃសំពះ បន្ទាប់មកបានចូលតាមបង្អួចខាងត្បូង ដៃកាន់ញញួរដងឈើមួយ បានធ្វើសកម្មភាពវាយទៅលើរូបសំណាកព្រះអង្គដងកើ ពេលនោះអ្នកមើលការងារ ក្នុងព្រះអង្គដងកើឃើញ ក៏ស្រែកឆោឡោឡើងស្របពេលនោះកម្លាំងសមត្តកិច្ចប៉ុស្តិ៍ជយ័ជំនះ ប្រចាំការគោលដៅបានមកដល់កន្លែងកើតហេតុ អន្តាគមន៍ឈានដល់ការបង្ក្រាបនឹងឃាត់ខ្លួនជនសង្ស័យព្រមទាំងដកហូតវត្ថុតាង ញញួរដងឈើ០១ ជាឧបករណ៍ធ្វើសកម្មភាពនាំយកមកប៉ុស្តិនគរបាលជយ័ជំនះ ដើម្បីដំណើរការជំនាញអនុវត្តនិតិវិធីច្បាប់។

ទីសក្ការព្រះអង្គដងកើជារៀងរាល់ថ្ងៃសីល ឬថ្ងៃពេញបូណ៌មីមានមនុស្សទៅបែបន់រាប់រយនាក់ ជាពិសេសចាប់ពីម៉ោង៣រសៀលគឺមានច្រើនរហូតដល់រកកន្លែងអុជធូបមិនបាន។ មិនថាតែអ្នកនៅក្នុងរាជធានីភ្នំពេញទេ ដែលទៅបែបន់ សូម្បីតែអ្នកនៅតាមបណ្តាខេត្តនានាក៏ទៅអុជធូបនៅទីនោះផងដែរ៕