ជប៉ុនស្នើឱ្យមានការបង្កើននូវវគ្គបណ្តុះបណ្តាលផ្សេងៗ និងជំនាញភាសាជប៉ុនក្នុងខេត្តសៀមរាប

ក្រសួងអប់រំ យុវជន និងកីឡាកម្ពុជាបានជួបពិភាក្សាជាមួយនឹងអង្គការ NPO Kyousei Forum តំណាងរបស់ជប៉ុន លើវិស័យអប់រំពីរចំណុចដែលភាគីជប៉ុនបានស្នើ គឺការបង្កើននូវវគ្គបណ្តុះបណ្តាលផ្សេងៗ ព្រមទាំងពង្រឹងការរៀនជំនាញភាសាជប៉ុនបន្ថែមទៀតក្នុងខេត្តសៀមរាប។ ជំនួបពិភាក្សានេះ ធ្វើឡើងកាលពីថ្ងៃទី ២២ ខែសីហា ឆ្នាំ២០២២ នៅទីស្តីការក្រសួងអប់រំ យុវជន និងកីឡា។ 

លោកបណ្ឌិតសភាចារ្យ ហង់ជួន ណារ៉ុន និងតំណាងរបស់អង្គការជប៉ុន NPO Kyousei Forum បានជួបពិភាក្សាគ្នាវិស័យអប់រំចំនួនពីរចំណុចសំខាន់ៗ ក្នុងការបង្កើនវគ្គបណ្តុះបណ្តាលនៅមជ្ឈមណ្ឌលអប់រំបច្ចេកទេសមិត្តភាពកម្ពុជា-ជប៉ុន ក្នុងខេត្តសៀមរាប។ 

ការបង្កើនវគ្គបណ្តុះបណ្តាលនោះរួមមានទី១ គឺការបង្កើននូវជំនាញភាសាជប៉ុន និងជំនាញថែទាំមនុស្សចាស់ ក៏ដូចជាជំនាញកែច្នៃអាហារ ដោយក្នុងនោះនឹងមានចាប់ផ្តើមពីវគ្គខ្លីៗរហូតដល់កម្រិតសញ្ញាបត្របច្ចេកទេសជាន់ខ្ពស់។ ទី២ គឺការជ្រើសរើសសិស្សពូកែនៅកម្រិតអនុវិទ្យាល័យ ដើម្បីបង្រៀនជំនាញភាសាជប៉ុន និងអាចឱ្យសិស្សានុសិស្សបន្តការសិក្សាភាសាជប៉ុនក្នុងកម្រិតវិទ្យាល័យនៅឯប្រទេសជប៉ុន។

ជាមួយគ្នានោះ មន្ត្រីជាន់ខ្ពស់ក្រសួងអប់រំ យុវជន និងកីឡាលោកបណ្ឌិតសភាចារ្យ ហង់ជួន ណារ៉ន ក៏បានយល់ព្រម និងគាំទ្រចំពោះសំណើររបស់តំណាងប្រទេសជប៉ុនលើកឡើងមក ព្រោះការស្នើនេះគឺជាផ្នែកមួយជួយលើកស្ទួយ និងពង្រឹងវិស័យអប់រំ ព្រមទាំងមិត្តភាពរបស់ កម្ពុជា-ជប៉ុន កាន់តែមានភាពល្អប្រសើរឡើង៕ 

ដោយ៖ អុន ស្រីមាន