វិវាទដីធ្លីរ៉ាំរ៉ៃធំៗ ៥ ករណី ត្រូវបានក្រសួងដែនដី ដោះស្រាយបញ្ចប់ក្នុងរយៈពេល ៥ឆ្នាំចុងក្រោយនេះ

ក្នុងរយៈពេល ៥ឆ្នាំចុងក្រោយនេះ ក្រសួងរៀបចំដែនដី នគរូបនីយកម្ម និងសំណង់ បានដោះស្រាយបញ្ចប់នូវវិវាទដីធ្លីរ៉ាំរ៉ៃធំៗ ចំនួន ៥ ករណី។

លោក ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងរៀបចំដែនដី នគរូបនីយកម្ម និងសំណង់” នាព្រឹកថ្ងៃទី ២៤ ខែសីហានេះថា ការដោះស្រាយវិវាទដីធ្លីបានឈរលើមូលដ្ឋាន នៃការសម្រុះសម្រួលតាមរយៈយន្ដការអាជ្ញាធរជាតិដោះស្រាយទំនាស់ដីធ្លី គណៈកម្មការសុរិយោដី និងក្រុមដោះស្រាយវិវាទដីធ្លីរបស់ក្រសួង និងក្រុមការងារដោះស្រាយវិវាទដីធ្លីចល័ត។

លោកថា ក្នុងរយៈពេល ៥ឆ្នាំចុងក្រោយនេះ បានទទួលបណ្ដឹងសរុប ៥,៨៥៣ករណី ហើយដោះស្រា​យបញ្ចប់នីតិវិធីចំនួន ៣,៦២០ករណី និងកំពុងដោះស្រាយចំនួន ៣, ៣៨៩ករណី។ ក្នុងនោះ គិតពីចាប់ផ្ដើមអនុវត្តដល់ខែមិថុនា ឆ្នាំ ២០២២ បានទទួលបណ្ដឹងសរុបចំនួន ១៤,៣០ករណី ហើយដោះស្រាយបញ្ចប់នីតិវិធីចំនួន ១០,៩១៩ករណី និងកំពុងដោះស្រាយ ៣,៣៨៩ករណី។

ជាមួយគ្នានេះដែរ ក្រសួងរៀបចំដែនដី នគរូបនីយកម្ម និងសំណង់ ក៏បានដោះស្រាយវិវាទដីធ្លីរ៉ាំរ៉ៃចំនួន ៥ករណី រួមមាន៖

១. បានដោះស្រាយគោលនយោបាយជូនប្រជាពលរដ្ឋ ដែលរងផលប៉ះពាល់ពីគម្រោងសម្បទានដីសេដ្ឋកិច្ច ដំណាំអំពៅផលិតស្ករសនាំចេញ ស្ថិតនៅខេត្តកោះកុង ឧត្ដរ​មានជ័យ ព្រះវិហារ និងខេត្តកំពង់ស្ពឺ ចំនួន ២,៥២៤គ្រួសារ លើផ្ទៃដីសរុបទំហំ ៥,៣៦១,៥០ហិកតា និងថវិកាចំនួន ២,១៦៥,៥០០ដុល្លារអាមេរិក។ ២. បាននិងកំពុងដោះស្រាយផលប៉ះពាល់ពីគម្រោងរបស់ក្រុមហ៊ុន Union ស្ថិតក្នុងភូមិសាស្រ្ដ ស្រុកបូទុមសាគរ ខេត្តកោះកុង ពាក់ព័ន្ធជាមួយប្រជាពលរដ្ឋ ១,៣៣៣គ្រួសារ។ ក្នុងនោះ ប្រជាពលរដ្ឋចំនួន ១,២៣១គ្រួសារ ស្មើនឹង ៩២ភាគរយ បានទទួលយកការដោះស្រាយរួច នូវផ្ទៃដីទំហំ ១,៧៥៨,៥ហិកតា និងថវិកាសរុប ១,៤៣១,០០០ដុល្លារ។

៣. អនុវត្តបទបញ្ជាដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី កាលពីថ្ងៃទី ២៨ ខែវិច្ឆិកា ឆ្នាំ ២០២១ ការបង្រ្កាបការទន្ទ្រានដីរដ្ឋ ក្នុងដែនព្រៃលិចទឹកនៃតំបន់ទន្លេសាប ទទួលបានលទ្ធផលដូចជា៖ ប្រជាពលរដ្ឋស្ម័គ្រចិត្តប្រគល់ដីជូនរដ្ឋវិញចំនួន ១៥,០០២ គ្រួសារ ស្មើនឹង ៦៣,១៩០,៨០ហិកតា, បានកប់គ្រាប់ត្នោតចំនួន ៣៤៣,៤០០គ្រាប់, ដើមត្នោត ១៣៩ដើម, ដើមច្រកែង ២០០ដើម, ដើមរាំង ១៩,០១៣ដើម, ដើមឬស្សី ១៣,៧០៩ដើម, ដើមផ្ទោល ២០០ដើម, ដើមរំដេញ ៦,៩៣៤ដើម, ដើមសណ្ដាន់ ៣,៤៨៥ដើម, ដើមត្រស់ ៧៦៤ដើម, ដើមអញ្ចាញ ១៥៦ដើម, ដើមផ្គាំ ៦៥០ដើម, ដើមថ្លើមអណ្ដើក ៣៥៦ដើម, ដើម្បបបួយ ១៥០ ដើម, ដើមខ្នាយមាន់ ៣៥០ដើម, ដើមកន្សែង ២០០ដើម, និងដើមផ្សេងៗ ៩,៥០០ដើម។

៤. អនុវត្តបទបញ្ជាដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី កាលពីថ្ងៃទី ២៧ ខែឧសភា ឆ្នាំ ២០២២ ដីទំហំ ២៤,៩៤០ហិកតា ៦២អា និង ៩៧សង់ទីអា ស្ថិតនៅតំបន់ជុំវិញទន្លេសាប ត្រូវបានកាត់ឆ្វៀលជូនប្រជាពលរដ្ឋសរុប ១៧,៣៤៩គ្រួសារ។ ក្នុងនោះ ផ្ដល់សិទ្ធិជាកម្មសិទ្ធិនូវផ្ទៃដីទំហំ ១១,២៥៥ហិកតា ៩២អា និង ៩០ សង់ទីអា ជូនប្រជាពលរដ្ឋ ១២,០៤១ គ្រួសារ និងផ្ដល់សិទ្ធិប្រើប្រាស់ និងអាស្រ័យផលទំហំ ១៣,៦៨៥ហិកតា ៣៣អា និង ៦៨សង់ទីអា ជូនប្រជាពលរដ្ឋ ៥,៣០៨គ្រួសារ។

៥. ករណីវិវាទដីធ្លីនៅលើកោះរ៉ុង ត្រូវបានដោះស្រាយដោយធ្វើប្រទានកម្មជាកម្មសិទ្ធិនូវផ្ទៃដីទំហំ ៥២៨,៣៧ហិកតា ជូនប្រជាពលរដ្ឋដែលរស់នៅអចិន្ត្រៃយ៍លើកោះរ៉ុងចំនួន ២៩៨គ្រួសារ៕

អត្ថបទ៖ ឃួន សុភ័ក្រ