អាជ្ញាធរចុះពិនិត្យ និងជួសជុលចំណោទផ្លូវលំចុះភ្នំតាអុក ក្នុងស្រុកបូទុមសាគរ ក្រោយរងការខូចខាតដោយសារទឹកហូរច្រោះ

រៀងរាល់ឆ្នាំពេលភ្លៀងធ្លាក់ជោកជាំ ចំណោទផ្លូវលំចុះភ្នំតាអុក ឃុំអណ្តូងទឹក ស្រុកបូទុមសាគរ តែងជួបការខូចខាត ដោយសារកម្លាំងទឹកហូរច្រោះដាច់ផ្លូវ ធ្វើឲ្យប្រជាពលរដ្ឋលំបាកធ្វើដំណើរទៅមកជាខ្លាំង។ បញ្ហានេះ គេសង្កេតឃើញថា មានអាជ្ញាធរស្រុក ឃុំ ភូមិ និងសប្បុរសជនរួមគ្នា ចុះជួសជុលបឋមសម្រួលចរាចរណ៍។

ស្ថានភាពលំបាក ធ្វើដំណើរងាយប្រឈមនឹងគ្រោះថ្នាក់ នៅចំណោទផ្លូវលំចុះភ្នំតាអុក នៅក្នុងភូមិតាអុក ភូមិតាមាឃ និងភូមិប្រទាល តែងតែរងការខូចខាតស្ទើរតែរាល់ឆ្នាំ ដោយសារតែបរិមាណទឹកភ្លៀងហូរកាត់ផ្លូវជាដុំៗ។

លោក ហាក់ ឡេង អភិបាលស្រុកបូទុមសាគរ បានឲ្យដឹងនៅថ្ងៃទី ២៦ ខែសីហានេះថា រថយន្តធុនធំមួយចំនួន មិនអាចឡើងចំណោទដែលកំពុងខូចខាតបានទេ។ រីឯរថយន្តតូចវិញ ខ្លះកល់ទ្រូងពាក់កណ្តាលចំណោទក៏មាន គ្រាផ្លូវលំមួយខ្សែនេះមានសារៈដល់ការធ្វើដំណើរ និងដឹកជញ្ចូនទំនិញជលផលកសិកម្ម។

តែទោះយ៉ាងណា លោកអភិបាលស្រុកបូទុមសាគរ កាលពីថ្ងៃទី ២៥ ខែសីហាម្សិលមិញ បានដឹកនាំមេឃុំអណ្តូងទឹក មេភូមិទាំង ៣ ប្រជាពលរដ្ឋ ព្រមទាំងសប្បុរសជន ចុះពិនិត្យ និងជួសជុលដោយទិញថ្មក្រារ៉ែតមកក្រាលលើគ្រួសក្រហម នៅចំណុចជម្រាលចុះឡើងភ្នំអុកជាបណ្តោះអាសន្នសិន ដើម្បីសម្រួលដល់ការធ្វើដំណើរងាយស្រួល។

ក្រៅពីបញ្ហាចំណោទផ្លូវឡើងចុះភ្នំតាអុក ក៏មានដែលចំណោទនៅឃុំថ្មស រងការខូចខាតដូចគ្នាដោយអាជ្ញាធរពាក់ព័ន្ធពិនិត្យជួសជុលភ្លាមៗផងដែរ ដោយមិនទុកឲ្យប្រជាពលរដ្ឋលំបាក ឬគ្រោះថ្នាក់ពេលធ្វើដំណើរនោះទេ។

ប្រសិនបើលោក-អ្នក ធ្វើដំណើរពីកែងមហាវិថី សាយ ភូថង តាមផ្លូវលំក្រួសក្រហមមកដល់ចំណោទភ្នំតាអុក មានប្រវែងជិត ១០គីឡូម៉ែត្រ ហើយទៅដល់ឃុំថ្មសមានប្រវែងជាង ១០គីឡូម៉ែត្រទៀត ដោយផ្លូវមួយខ្សែនេះ ស្ថិតនៅក្រោមគម្រោងអភិវឌ្ឍន៍ជួសជុលថែទាំ របស់មន្ទីរសាធារណការ និងដឹកជញ្ចូនខេត្តកោះកុង៕

អត្តបទ៖ សិរីវឌ្ឍនៈ