កសិករ​ភូមិគោក​ស្រុកដាំខ្ទឹមលក់​អាចរកចំណូល​ជួយសេដ្ឋកិច្ចគ្រួសារ ​មានការប្រែមុខ​មាត់ថ្មី​ជាលំដាប់

ខ្ទឹមជាដំណាំម៉្យាងមិនពិបាកដាំ ដើមស្លឹកគេយកធ្វើម្ហូបកាត់ចំអាបយ៉ាងមានប្រសិទ្ធភាពកសិករ​សហគមន៍កសិកម្មបៃតងគោកស្រុក ស្ថិតក្នុងភូមិគោកស្រុក ឃុំគោកស្រុក ស្រុកដំបែរ ខេត្តត្បូងឃ្មុំ ប្រមាណ៦០គ្រួសារ និយមដាំ ព្រោះដំណាំ ខ្ទឹមជាសក្តានុពលនៃចំណូល​សេដ្ឋកិច្ចគ្រួសារ​យ៉ាង​សំខាន់បំផុត ដាំទៅតាមបច្ចេកទេសជាដំណាំមានលក្ខណៈប្រភេទប្រពលវប្បកម្មផងដែរ។

​ក្នុងមួយថ្ងៃៗ ​កសិករ​សហគមន៍​ប្រមូលផលខ្ទឹមលក់ទៅកាន់ទីផ្សារពី ២ទៅ ៣តោន ​ជារៀងរាល់ថ្ងៃ​ ធ្វើឲ្យជីវភាពប្រជាកសិករកាន់តែប្រសើរឡើងៗជាលំដាប់។

លោក ជឿន ឡុង អាយុ ៣០ឆ្នាំ ជាកសិកររស់នៅភូមិគោកស្រុក ឃុំគោកស្រុក ស្រុកដំបែរ ខេត្តត្បូងឃ្មុំបានរៀបរាប់ឲ្យដឹងថា ខ្ទឹម កសិករដាំយកដើមស្លឹកលក់ មិនមែនយកមើមលក់ទេ។

នៅលើផ្ទៃដីទំហំ ២០អា អាចប្រមូលផលបានជិតមួយតោន ក្នុងរយៈពេល៤៥ថ្ងៃ ហើយក្នុង១ឆ្នាំ យើងធ្វើបាន៤ដង គិតប្រាក់ចំណូល ដោយផាត់ការចំណាយ ថ្លៃពលកម្មកម្មករ ជី ការភ្ជួរលើករង សល់បាន១៦លានរៀលដែរ។

លោក ជឿន ឡុង បានឲ្យដឹងទៀតថា ការដាំដុះខ្ទឹមមានការលំបាកខ្លះ ដែរ បើមានភ្លៀងធ្លាក់ច្រើន ទឹកដក់ ធ្វើឲ្យខ្ទឹមរលួយ កើតរោគផ្សិត និងមានសត្វល្អិតបំផ្លាញច្រើន។

តែសហគមន៍កសិកម្មបៃតងគោកស្រុក មានមន្ត្រីកសិកម្មខេត្ត និងប្រធានសហគមន៍​បានផ្តល់​បច្ចេកទេស ការដាំដុះ ធ្វើដី ពូនរងឲ្យស្មើស្អាត ការថែទាំទឹក ស្រោចទឹក ដាក់ជីគីមីធម្មជាតិ ជីកំប៉ុស ទ្រាប់បាត កំចាត់សត្វល្អិត ដល់ការដាំដុះទើបកសិករទទួលបានជោគជ័យគួរឲ្យមោទនៈបំផុត។ ឆ្នាំនេះខ្ទឹមឲ្យផលចាញ់ឆ្នាំទៅមិញទេ ដោយសារកត្តាទឹកភ្លៀងមិនអំណោយផលតែតម្លៃល្អជាងឆ្នៃ​ទៅ ទោះយ៉ាងណាក៏ដោយទីផ្សារខ្ទឹមស្រួលលក់ មានម៉ូយចូលទិញដល់ទីចំការតែម្តង។

លោក ទេន ទុំ ប្រធានសហគមន៍កសិកម្មគោកស្រុក បានបញ្ជាក់ឲ្យដឹងថា ក្នុង​សហគមន៍របស់លោកមានកសិករប្រមាណ៦០គ្រួសារ មានដាំបន្លែប្រភេទ ខ្ទឹមស្លឹក ត្រសក់ ននោង ត្រឡាច ប៉េងប៉ោះ ត្រប់ សណ្តែកគួរ និងម្រះ។

សហគមន៍យើងបានកើតឡើងជាង២ឆ្មាំហើយ តែដំណើរការក្នុងការដាំបន្លែ មានការរីកចម្រើនខ្លាំង ពិសេសខ្ទឹមស្លឹកលក់ទៅកាន់ទីផ្សារ សួង កំពង់ចាម និងរាជធានីភំ្នពេញក្នុងមួយថ្ងៃមិនក្រោមពី ២ ទៅ៣តោន នោះទេ ក្នុងរដូវវស្សានេះ បើរដូវប្រាំងវិញលក់បានពី៣ ទៅ៤តោនក្នុង១ថ្ងៃ ក្នុងតម្លៃពី​៣០០០រៀល ទៅ៣២០០រៀល។

ការដាំខ្ទឹម វាអាចផ្តល់ការងារដល់ប្រជាពលរដ្ឋក្នុងភូមិដែលអាចរក​ប្រាក់ចំណូលក្នុងម្នាក់ពី២ទៅ៣ម៉ឺនរៀលផងដែរ រយៈពេលតែមួយព្រឹកប៉ុណ្ណោះ។ ការដាំបន្លែប្រកបដោយបច្ចេកទេសធ្វើឲ្យកសិករមានជីវភាពឈានឡើងល្អបំផុត៕

អត្ថបទ៖ សាន វិឡែម