ក្រសួងមហាផ្ទៃ ប្រកាសផ្តល់ប័ណ្ណស្នាក់នៅអចិន្ត្រៃយ៍ឱ្យជនបរទេសអន្តោប្រវេសន្តនៅកម្ពុជា

ក្រសួងមហាផ្ទៃ បានប្រកាសផ្តល់ប័ណ្ណស្នាក់នៅអចិន្ត្រៃយ៍ឱ្យជនបរទេសអន្តោប្រវេសន្តនៅកម្ពុជា និងជូនដំណឹងដល់ស្ថាប័នរដ្ឋបាលថ្នាល់ក្រោមជាតិ និងវិស័យឯកជន ទទួលស្គាល់ប័ណ្ណស្នាក់នៅនេះ ព្រមទាំង បង្កលក្ខណៈស្របតាមច្បាប់ជាធរមាន។

សេចក្តីជូនដំណឹងរបស់ក្រសួងមហាផ្ទៃស្តីពីការផ្តល់ប័ណ្ណស្នាក់នៅអចិន្ត្រៃយ៍ឱ្យជនបរទេសអន្តោប្រវេសន្តនៅព្រះរាជាណាចកកម្ពុជាចុះថ្ងៃទី២៩សីហាបានឱ្យដឹងថា ក្រសួងមហាផ្ទៃ បានចេញប័ណ្ណស្នាក់នៅអចិន្ត្រៃយ៍ជូនដល់ជនបរទេសអន្តោប្រវេសន្ត ដែលបានទទួលស្គាល់ដោយប្រកាសរបស់ក្រសួងមហាផ្ទៃ សម្រាប់ប្រើប្រាស់បម្រើជីវភាពប្រចាំថ្ងៃ ដូចជា ការស្នើសុំសេវារដ្ឋបាល សេវាសាធារណៈ សេវាសុខភាព សេវាធនាគារ ការទិញលក់ចលនវត្ថុ អចលនវត្ថុ ការធ្វើអាជីវកម្ម ការស្នើសុំធ្វើការងារតាមរោងចក្រ សហគ្រាស និងសកម្មភាពមួយចំនួនទៀត ដែលច្បាប់អនុញ្ញាតសម្រាប់ជនបរទេស។

ទន្ទឹមនេះ ក្រសួងមហាផ្ទៃ ក៏បានចេញសេចក្ដីណែនាំលេខ ០១៥សណន ចុះថ្ងៃទី០១ ខែកក្កដាឆ្នាំ២០១៩ ស្តីពីការចេញលិខិតរដ្ឋបាល និងលិខិតអត្រានុកូលដ្ឋានឱ្យសហព័ទ្ធជាខ្មែរ កូន និងជនបទសអន្តោប្រវេសន្ត ដែលក្នុងសេចក្តីណែនាំនោះ ក៏មានជម្រាបជូនអំពីតម្លៃប្រើប្រាស់ប័ណ្ណស្នាក់នៅអចិន្ត្រៃយ៍ ដែលក្រសួងបានចេញជនបរទេសអន្តោប្រវេសន្តផងដែរ។

ក្រសួងបានបន្តថា សេចក្ដីណែនាំលេខ ០១៥ សណន ត្រូវបានផ្សព្វផ្សាយជាច្រើនលើក ប៉ុន្តែក្រសួងមហាផ្ទៃបានសង្គេតឃើញថានៅមានក្រសួង ស្ថាប័ន រដ្ឋបាលថ្នាក់ ក្រោមជាតិ និងវិស័យឯកជនមួយចំនួន ពុំទាន់បានជ្រួតជ្រាប និងទទួលស្គាល់តម្លៃក្នុងការប្រើប្រាស់ប័ណ្ណ ស្នាក់នៅអចិន្ត្រៃយ៍នេះនៅឡើយ។ អាស្រ័យហេតុនេះ ក្រសួងមហាផ្ទៃ សូមធ្វើការជូនដំណឹងដល់ក្រសួង ស្ថាប័ន រដ្ឋបាលថ្នាក់ក្រោមជាតិនិងវិស័យឯកជន ដើម្បីទទួលស្គាល់ប័ណ្ណស្នាក់នៅអចិន្ត្រៃយ៍សម្រាប់ជនបរទេសអន្តោប្រវេសន្តនៅក្នុងព្រះរាជាណាចក្រកម្ពុជា និងបង្កលក្ខណៈស្របតាមច្បាប់ជាធរមាន។ ក្រសួងមហាផ្ទៃ សង្ឃឹមយ៉ាងមុតមាំថាសេចក្ដីជូនដំណឹងនេះនឹងទទួលបាននូវការជ្រួតជ្រាបជាផ្លូវការ៕

ដោយ៖ សំអឿន