លោក ឈឹម សេរីភួន អ្នកកាសែតជើងចាស់ ត្រូវបានព្រះមហាក្សត្រតែងតាំងជាទីប្រឹក្សាក្រសួងមហាផ្ទៃ

លោក ឈឹម សេរីភួន ដែលជាអ្នកកាសែតជើងចាស់ដែលប្រឡូកនៅក្នុងវិស័យសារព័ត៌មានជាង៣០ឆ្នាំនៅកម្ពុជា ត្រូវបានព្រះមហាក្សត្រ ព្រះបាទ នរោត្តម សីហមុនី តែងតាំងជាទីប្រឹក្សាក្រសួងមហាផ្ទៃ។ នេះបើយោងតាមព្រះរាជក្រឹត្យរបស់ព្រះករុណា ដែលទើបផ្សព្វផ្សាយជាសាធារណៈនៅថ្ងៃទី៣០ ខែសីហា ឆ្នាំ២០២២នេះ។

ក្រៅពីជាអ្នកកាសែតជើងចាស់នៅកម្ពុជា លោក ឈឹម សេរីភួន ក៏ជាអ្នកនិពន្ធសៀវភៅ«របត់នយោបាយ សីហនុ-លន់ នល់-ប៉ុល ពត-ហ៊ុន សែន»។ សៀវភៅនេះ ត្រូវបានបោះពុម្ភបាន២ភាគ ហើយនៅមានជាច្រើនភាគទៀតដែលនឹងចេញផ្សាយនៅពេលខាងមុខនេះ។ លោក ឈឹម សេរីភួន ធ្លាប់បានប្រាប់«កម្ពុជាថ្មី»ថា សៀវភៅនេះ គឺជាមរតកក្នុងមួយជីវិតរបស់លោកហើយ ដោយលោកបានចំណាយពេលជាង២០ឆ្នាំ ដើម្បីធ្វើការសិក្សា ស្រាវជ្រាវ និងសរសេរសៀវភៅនេះឡើង៕