សាលារៀនចំនួន ៧០ ត្រូវបានបញ្ចូលជាគម្រោងជួយដល់កុមារពិការភាព

អនុរដ្ឋលេខាធិការក្រសួងអប់រំ យុវជន និងកីឡា លោក ជា ជាតិ បានឲ្យដឹងថា បច្ចុប្បន្នអង្គការសាលារៀនទន្សាយកំពុងរៀបចំគម្រោងផែនការជួយដល់កុមារមានពិការភាព និងកុមារដែលបាត់បង់ឱកាសទៅសាលារៀនទាំង ៧០ ក្នុងរាជធានីខេត្តមួយចំនួន ដោយបានយកសាលាបឋមសិក្សាទួលគោកជាទីតាំងអនុវត្តគម្រោង។

ថ្លែងនៅក្នុងពីធីសម្ពោធដាក់ឲ្យប្រើប្រាស់បណ្ណាល័យឌីជីថល និងអគារសិក្សាសម្រាប់កុមារពិការសតិបញ្ញា និងអូទីស្សឹមនៅសាលាបឋមសិក្សាទួលគោកនៅថ្ងៃទី ៣០ ខែសីហា ២០២២នេះ លោក ជា ជាតិ បានបញ្ជាក់ថា នៅក្នុងរយៈពេល ៤ឆ្នាំកន្លងមកនេះ តាមរយៈដៃគូរួបរួមគ្នាផ្តល់ដល់ឱកាសអប់រំដល់កុមារ ដែលដឹកនាំដោយអង្គការ អេត អេ អាក់ ស្យុង ក្រោមជំនួយថវិកាពីអង្គការ អ៊ី អេ ស៊ី​(Educated A Child) អង្គការសាលារៀនទន្សាយ កំពុងអនុវត្តគម្រោងជួយកុមារក្រៅសាលាចំនួន ២ ៨០០ នាក់ ក្នុងចំណោមកុមារ ១ សែននាក់ ទៅលើសាលាចំនួន ៧០ ក្នុងក្រុង ស្រុក/ខណ្ឌ នៃរាជធានីខេត្តចំនួន៤ មានខណ្ឌទួលគោក រាជធានីភ្នំពេញ ស្រុកអង្គស្នួល ស្រុកកណ្ដាលស្ទឹង ខេត្តកណ្ដាល ស្រុកសំរោងទង ក្រុងច្បារមន ខេត្តកំពង់ស្ពឺ និងស្រុកពួក ខេត្តសៀមរាប ដែលបានយកសាលាបឋមសិក្សាទួលគោកជាទីតាំងអនុវត្តគម្រោងរបស់អង្គការសាលារៀនទន្សាយមួយនេះ។

លោក ជា ជាតិ បានបន្ថែមថា ការអនុត្តនៃគម្រោងនេះ ក៏ដើម្បីរួបរួមគ្នាជួយដល់កុមារដែលបាត់បង់ឱកាសនៅកម្ពុជា ជាមួយដៃគូ និងអង្គការមិនមែនរដ្ឋាភិបាលជាតិ និងអន្តរជាតិចំនួនជាង ៣០ អង្គការ នឹងដើម្បីធានាថា​ កុមារគ្រប់អាយុទាំងអស់បានចូលរៀន កុមារដែលមានពិការភាព​ កុមារអនាថា និងងាយរងគ្រោះ កុមារជនជាតិភាគតិច ​​កុមារក្រីក្ររស់នៅតំបន់ដាច់ស្រយាល​ និងកុមារហួសអាយុចូលរៀន ជាពិសេសកុមារី ឱ្យបានចូលរៀន​ និងរៀនបន្តប្រកបដោយគុណភាពនៅមត្តេយ្យសិក្សា និងនៅក្នុងការអប់រំកម្រិតមូលដ្ឋាន។

មិនតែប៉ុណ្ណោះ​ គម្រោងនេះ​ បានរៀបចំបន្ស៊ីគ្នាជាមួយនឹងផែនការយុទ្ធសាស្រ្តវិស័យអប់រំរបស់ក្រសួងអប់រំ ដោយ​​ផ្តោត​លើគោលនយោបាយយុទ្ធសាស្រ្តទាំងបីគឺធានាសមភាពនៃការចូលរៀន ការលើកកម្ពស់គុណភាព និងប្រសិទ្ធភាពសេវាអប់រំ និងការអភិវឌ្ឍសមត្ថភាពអ្នកពាក់ពន្ធ័។ 

គួរបញ្ជាក់ផងថា នៅក្នុងឆ្នាំ​២០០៨ ប្រទេសកម្ពុជា​មានជនពិការប្រហែលជិត ២សែននាក់ ដែលស្មើរនឹង ១,៤៤% នៃចំនួនប្រជាជនសរុប ក្នុងនោះបុរសមាន ៥៦.៣% និងស្ត្រីមាន ៤៣,៧% កុមារមានពិការភាពអាយុពី ០ ឆ្នាំ ដល់ ១៨ ឆ្នាំ​១៧,៧២% ជនមានពិការភាពដោយសារមីនចំនួន ៦ម៉ឺននាក់ ស្មើនឹង ៣៣,៣៦%៕

អត្ថបទ៖ ឌឿន ចាន់ថារី