ប្រាក់គោលនយោបាយរបបសន្តិសុខសង្គមរបស់រាជរដ្ឋាភិបាល ត្រូវបានផ្ដល់ជូនដល់ដៃក្រុមគ្រួសារសពនិវត្តន៍ជន

លោក ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមូលនិធិជាតិជំនួយសង្គម តំណាងលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក សំហេង បុរស រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានក្រុមប្រឹក្សាភិបាលមូលនិធិជាតិជំនួយសង្គម កាលពីរសៀលថ្ងៃទី ៣០ ខែសីហា ឆ្នាំ ២០២២ បាននាំយកប្រាក់គោលនយោបាយរបបសន្តិសុខសង្គម ជូនគ្រួសារសពនិវត្តន៍ជនចំនួន ៨ ២៨០ ០០០រៀល ដល់ដៃគ្រួសារសពឧបាសក នាង ធេម ស្ថិតផ្ទះលេខ ៤ ផ្លូវ ៣៥១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ក្រោយពេលដែលឧបាសក នាង ធេម បានទទួលមរណ: ភាពរយ:ពេល ៤ថ្ងៃរួចមក។

លោក ឈួរ សុបញ្ញា បានថ្លែងថា ប្រាក់គោលនយោបាយរបបសន្តិសុខសង្គមជូនគ្រួសារសពនិវត្តន៍ជន ជាកញ្ចប់ដែលរាជរដ្ឋាភិបាលផ្តល់ជូនក្រុមគ្រួសារសពនិវត្តន៍ជនជាលើកចុងក្រោយ ដែលមានទំហំទឹកប្រាក់ស្មើ ១២ដង នៃប្រាក់សោធននិវត្តន៍ចុងក្រោយមុន ពេលទទួលមរណ:ភាព។ លោកបន្តថា ដើម្បីទទួលបានប្រាក់គោលរបបនេះ ក្រុមគ្រួសារសពត្រូវបំពេញបែបបទ និងភ្ជាប់ឯកសារដូចខាងក្រោម៖ ទី១. សេចក្តីចម្លងសំបុត្រមរណៈភាព។ ទី២. សៀវភៅគ្រួសារ ឬសៀវភៅស្នាក់នៅ។ ទី៣.សៀវភៅធនាគារ ឬប័ណ្ណព័ត៌មាន ឬATM ។ ទី៤. អត្តសញ្ញាណប័ណ្ណអ្នកស្នើសុំ។ បើមានចម្ងល់ ឬចង់សាកសួរព័ត៌មានបន្ថែម សូមទំនាក់ទំនងទៅកាន់ទូរសព្ទលេខ៖ ០៧០ ៦០៧ ៧៨៣/ ០៩៥ ២៧៩ ៣៣៣/  ០៩៧  ៣១១ ៨០០០៕

អត្ថបទ៖ វិមាន