ព័ត៌មានជាតិ

ក្រសួងការងារនឹងបើកប្រាក់ឈ្នួលជូនកម្មករក្រុមហ៊ុន ស៊ុន ស៊ីងហ្គាមិនដែលត្រូវថៅកែរត់ចោលនៅថ្ងៃស្អែក

បានផុស

២ years មុន

នៅ

ថ្ងៃពុធ ៣១ សីហា ២០២២

ដោយ

ក្រសួងការងារ និងបណ្តុះបណ្តាលវិជ្ជាជីវៈបានប្រកាសបើកប្រាក់ឈ្នួលជូនកម្មករនយោជិតធ្វើការនៅក្រុមហ៊ុន ស៊ុន ស៊ីង ហ្គាមិន ដែលត្រូវថៅកែរត់ចោលនៅថ្ងៃទី០១ខែកញ្ញាឆ្នាំ២០២២ស្អែកនេះនៅស្រុកអង្គស្នួល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈចុះនៅល្ងាចថ្ងៃទី៣១សីហានេះបានឱ្យដឹងថាដោយអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងនឹងចាប់ផ្តើមបើក ផ្ដល់ថវិកាបុរេប្រទានរបស់រាជរដ្ឋាភិបាលកម្ពុជាជូនបងប្អូនកម្មករនយោជិតធ្វើការនៅក្រុមហ៊ុន ស៊ុន ស៊ីងហ្គាមិន ចាប់ពីម៉ោង ១៤និង០០នាទីរសៀលថ្ងៃទី០១ ខែកញ្ញា ឆ្នាំ២០២២ តទៅនៅសាលាស្រុកអង្គស្នួល ស្ថិតនៅភូមិព្រៃពពេល ឃុំពើក ស្រុកអង្គស្នួល ខេត្តកណ្តាល។

ក្រសួងបានណែនាំឱ្យបងប្អូនកម្មករនិយោជិតយកមកជាមួយនូវឯកសារមួយចំនួនដូចជា ប័ណ្ណសម្គាល់ខ្លួនកម្មករនិយោជិត (ច្បាប់ដើម) ឬកិច្ចសន្យាការងារ និងសៀវភៅការងារកម្មករនិយោជិត ឬប័ណ្ណបេឡាជាតិសន្តិសុខសង្គម ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែននិង ប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ (បើមាន)។

លោក សៅ ប៊ុនធឿន អនុប្រធានការិយាល័យអន្តរាគមន៍នៃគណៈកម្មការដោះស្រាយវិវាទបាតុកម្មកូដកម្មនិងគ្រប់មុខសញ្ញាបានឱ្យដឹងកាលពីល្ងាចថ្ងៃទី៣១សីហានេះថាក្រុមហ៊ុន ស៊ុន ស៊ីង ហ្គាមិនជារោងចក្រកាត់ដេរស៊ីឈ្នួលតពីរោងចក្រផ្សេងទេដោយមានកម្មករចំនួន៤២នាក់ក្នុងនោះមាន២០ត្រូវបានដោះស្រាយបើកប្រាក់រួចរាល់។ ចំណែកនៅសល់កម្មករចំនួន២២នាក់ទៀតនៅមិនទាន់បានបើកនៅឡើយទេ ដោយថៅកែបានរត់ចោលបាត់ស្រមោល។

លោកបានបន្តថា ក្រោយពីថៅកែរត់ចោលកម្មករបានដាក់ពាក្យបណ្តឹងទៅសាលាស្រុកឱ្យជួយដោះស្រាយឱ្យហើយបានធ្វើការតវ៉ាដោយសន្តិវិធីកាលពីថ្ងៃទី១០ ខែសីហា ឆ្នាំ២០២២។

លោកបានបន្តថា បន្ទាប់មកក្រុមការងាររបស់លោកបានចូលរួមដោះស្រាយនិងបានរាយការណ៍ជូនក្រសួងការងារហើយក្រសួងនឹងចាប់ផ្តល់ដោះស្រាយបើកប្រាក់ឈ្នួលជួនពួកគាត់នៅរសៀលថ្ងៃស្អែកនៅសាលាស្រុកអង្គស្នួល៕

ដោយ ៖ សំអឿន