អភិបាលស្រុកបន្ទាយស្រី៖ ប្រជាពលរដ្ឋជាង ៥ ពាន់នាក់ ចាកចេញពីចម្ការ លោក ខឹម វាសនា

លោក ឃឹម ហ្វីណង់ អភិបាលនៃគណៈអភិបាលស្រុកបន្ទាយស្រី មានប្រសាសន៍ថា គិតចាប់ពីថ្ងៃទី ៣០ ខែសីហា ដល់ល្ងាចថ្ងៃទី ០១ ខែកញ្ញា ឆ្នាំ២០២២នេះ មានប្រជាពលរដ្ឋជាង ៥ ពាន់នាក់ ចាកចេញពីចម្ការម្រេចរបស់ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP)។

លោក ឃឹម ហ្វីណង់ បានឱ្យដឹងថា ក្នុងមួយថ្ងៃៗមានប្រជាពលរដ្ឋជាង ១ ពាន់នាក់ បានចាកចេញទៅលំនៅឋានរបស់ពួកគាត់វិញ ដោយខ្លះចេញជាលក្ខណៈគ្រួសារ ខណៈអាជ្ញាធរបានកំណត់ឱ្យត្រឡប់ទៅលំនៅឋានវិញឱ្យអស់ក្នុងរយៈពេល ៥ ថ្ងៃទៀត។ លោកបានបន្ដថា ក្រោយពីមានកិច្ចសន្យាបញ្ចប់ការជួលដីជាមួយម្ចាស់ដី ដែលជាសមាជិកគណបក្ស និងតំណាងលោក ខឹម វាសនា រួមមក ប្រជាពលរដ្ឋដែលប្រមូលជុំគ្នានោះ ពួកគាត់បានចាកចេញជាបន្ដបន្ទាប់។

ប្រជាជនភាគច្រើនជាមនុស្សចាស់ និងកូនក្មេង ដែលពួកគាត់បានមកស្នាក់នៅយូរថ្ងៃ ហើយប៉ះពាល់ដល់សុខភាព ព្រោះមុខមាត់គាត់មានសភាពស្លេកស្លាំង ដែលអាចមានផ្ទុកជំងឺផ្សេងៗ ព្រោះនៅបរិវេណនៃការស្នាក់នៅរបស់ពួកគាត់ បរិស្ថានមិនបានល្អ ខ្វះអនាម័យ។

លោកអភិបាលនៃគណៈអភិបាលស្រុកបន្ទាយស្រី បន្ដថា ក្រោយពីកំណត់រយៈពេល ៥ ថ្ងៃ បើប្រជាពលរដ្ឋនៅតែបន្ដប្រមូលផ្ដុំទៀត នោះអាជ្ញាធរនឹងមានវិធានបន្ថែមទៀត ដោយមានការផ្ដាច់ការចំអិនម្ហូបឱ្យអ្នកប្រមូលផ្ដុំ ផ្ដាច់ការទំនាក់ទំនងតាមវិទ្យុទាក់ទង ហើយនឹងឱ្យរុះរើរោងដោយខ្លួនឯង ព្រោះម្ចាស់ដីឈ្មោះ នី ចាន់ពិនិត្យ ជាសមាជិកគណបក្ស LDP និងជាម្ចាស់ដីជួល បានយល់ព្រមផ្ដិតមេដៃបញ្ជប់ការជួលឱ្យការប្រមូលផ្ដុំគ្នាដោយខុសច្បាប់នេះ។

លោក ឃឹម ហ្វីណង់ លើកឡើងថា អាជ្ញាធរបានត្រៀមរថយន្ដជាច្រើនគ្រឿង រួមមាន រថយន្ដសាលាខេត្ដសៀមរាប រថយន្ដយោធាយោធភូមិភាគទី៤ និងយោធាកងពលធំអន្ដរាគមន៍លេខ២ សម្រាប់ដឹកអ្នកដែលចង់ជិះ និងគ្មានលទ្ធភាពជិះរថយន្ដឈ្នួល ឬមធ្យោបាយឈ្នួលផ្សេងៗត្រឡប់ទៅផ្ទះវិញ។

សូមបញ្ជាក់ថា ចាប់ពីថ្ងៃទី ២៣ ខែសីហា ឆ្នាំ២០២២មក លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានសរសេរនៅលើបណ្ដាញសង្គម ហ្វេសប៊ុករបស់ខ្លួនថា តាមការធ្វើវិបស្សនារបស់លោកឃើញថា ភពផែនដីនឹងត្រូវជន់លិចនៅពេលខាងមុខ ហើយលោកអំពាវនាវឱ្យអ្នកដែលគាំទ្រទៅជួបជុំគ្នានៅលើដីចម្ការរបស់លោក ឯជើងភ្នំគូលែន នៃខេត្តសៀមរាប ទើបអាចរួចផុតពីគ្រោះមហន្តរាយនេះ។ បន្ទាប់ពីការសរសេរលើបណ្ដាញសង្គមរបស់មេបក្សរូបនោះមក ក៏មានពលរដ្ឋចូលរួមក្នុងចន្លោះពី ១ ម៉ឺន ៥ ពាន់ ទៅ ១ ម៉ឺន ៧ ពាន់ បាននាំក្រុមគ្រួសារ ធ្វើដំណើរខ្លះតាមរថយន្ត ខ្លះតាមម៉ូតូ ទៅកាន់តំបន់ជើងភ្នំគូលែន។ ចំណែកពលករខ្មែរខ្លះ ដែលកំពុងធ្វើការនៅក្រៅប្រទេសក៏ប្រញាប់ប្រញាល់វិលត្រឡប់មកកម្ពុជា ដោយបោះបង់ការងាររបស់ខ្លួនដែរ។

នៅថ្ងៃទី២៩ ខែសីហា ឆ្នាំ២០២២ អភិបាលខេត្តសៀមរាប លោក ទៀ សីហា បានសរសេរលិខិតមួយផ្ញើជូន លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ដោយសុំឱ្យបញ្ឈប់ការប្រមូលផ្តុំ និងរំសាយការជួបជុំ ចាប់ពីថ្ងៃទី ៣០ ខែសីហា ឆ្នាំ២០២២ វេលាម៉ោង ២៤:០០ នាទីយប់ និងរាល់សំណង់ដែលបានសាងសង់ត្រូវដាក់ពាក្យស្នើសុំអនុញ្ញាតពីអាជ្ញាធរ៕

អត្ថបទ៖ គឿនវេត