តំបន់ប្រតិបត្តិការសឹករងកំពង់ធំ នាំយកអំណោយ​​ឯកឧត្តម ហ៊ុន ម៉ាណែត ជូនគ្រួសារអតីតយុទ្ធជន

នៅថ្ងៃទី៥ ខែកញ្ញា ឆ្នាំ២០២២ លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដឹកនាំសហការីនាំយកអំណោយរបស់ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ទៅឧបត្ថម្ភជូនក្រុមគ្រួសារ អតីតយុទ្ធជនដែលមានជីវភាពខ្វះខាតចំនួន១២គ្រួសារ រស់នៅលើដីសម្បទានសង្គមកិច្ច ស្ថិតនៅភូមិដងក្ដារ ឃុំក្រយា ស្រុកសន្ទុក ខេត្តកំពង់ធំ ។

ក្នុងឱកាសនោះដែរ លោកឧត្តមសេនីយ៍ទោ សោម ស៊ុន ពាំនាំប្រសាសន៍ផ្តាំផ្ញើរសាកសួរសុខទុក្ខពីសំណាក់សាក់ឯកឧត្តម ហ៊ុន ម៉ាណែត និងលោកជំទាវ ដែលបានយកចិត្តទុកដាក់ចំពោះជីវភាពរបស់អតីតយុទ្ធជន។ ចំពោះវីរៈភាពដ៏ថ្លៃថ្លា ដែលបានលះបង់សាច់ស្រស់ ឈាមស្រស់ រហូតធ្លាក់ខ្លួនពិការ ហើយមួយចំនួនទៀតបានពលីជីវិតដើម្បីចូលរួមចំណែកទប់ស្កាត់ការវឹលត្រឡប់មកវិញ នៃរបបប្រល័យពូជសាសន៍ប៉ុលពត ដែលនេះជាប្រតិបត្តិករចូលរួមអនុវត្តនូវនយោបាយ ឈ្នះ ឈ្នះ របស់សម្តេចតេជោ ហ៊ុន សែន ក្នុងការបញ្ចប់សង្គ្រាម និងបង្រួបបង្រួមជាតិ ធ្វើឲ្យប្រទេសជាតិ យើងមានសុខសន្តិភាពពេញលេញ និងមានការអភិវឌ្ឍរីកចម្រើនដូចសព្វថ្ងៃនេះ ។

លោកឧត្តមសេនីយ៍ទោបន្តថា អំណោយដ៏ថ្លៃថ្លារបស់សម្តេចតេជោ ហ៊ុន សែន តាមរយៈឯកឧត្តមទេសរដ្ឋមន្រ្តី នាយ ឧត្ដមសេនីយ៍ គន់ គីម បានផ្តល់ជូនអតីតយុទ្ធជនក្នុងមួយគ្រួសារទទួលបានដីសម្បទានសង្គមកិច្ចមួយហិតាកន្លះ និងផ្ទះមួយខ្នង។ ទាំងអស់នេះ គឺជាការគិតគូរពីរាជរដ្ឋាភិបាល ចំពោះការលះបង់របស់អតីតយុទ្ធជនជូនជាតិមាតុភូមិ។

លោកឧត្តមសេនីយ៍ទោ បញ្ជាក់ថា អំណោយដែលបានឧបត្ថម្ភជូននៅពេលនេះ គឺក្នុងមួយគ្រួសារទទួលបាននូវអង្ករចំនួន២៥គីឡូក្រាម មីជាតិចំនួន១កេស ត្រីខចំនួន១យួរ និងថវិកាមួយចំនួនផងដែរ៕

អត្ថបទ៖ ឈាង មករា