សម្ដេច ស ខេង ​ព្រមាន អាជ្ញាធរមូលដ្ឋាន មិនឱ្យឃុបឃិតដាក់សាច់ញាតិទទួលប្រាក់ឧបត្ថម្ភ

សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានណែនាំ និងព្រមានដល់អាជ្ញាធរមូលដ្ឋាន ត្រូវពង្រឹងការបំពេញការងារកំណត់អត្តសញ្ញាណកម្មគ្រួសារក្រីក្រ ឱ្យបានច្បាស់លាស់ ដើម្បីឱ្យដំណើរការអនុវត្តកម្មវិធីឧបត្ថម្ភសាច់ប្រាក់​ជុំទី៤ ប្រព្រឹត្តទៅប្រកបដោយប្រសិទ្ឋភាព តម្លាភាព និងសមធម៌។

សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ មានប្រសាសន៍ថា មេភូមិ និងក្រុមប្រឹក្សាឃុំសង្កាត់ ត្រូវពង្រឹងការបំពេញការងារ និងកំណត់ឱ្យច្បាស់លាស់បំផុត ហើយត្រូវចៀសវាងឱ្យខាងតែបាននូវការយោគយល់ និងឃុបឃិតគ្នាដើម្បីដាក់បញ្ចូលក្រុមគ្រួសារ សាច់ញាតិ មិត្តភ័ក្តិ ឬអ្នកស្គាល់គ្នា ដែលមិនមែនជាគ្រួសារក្រីក្រ និងងាយរងគ្រោះពិតប្រាកដ ដើម្បីទទួលប្រាក់ឧបត្ថម្ភនេះ។

សម្ដេចក្រឡាហោម ស ខេង បានជំរុញដល់រដ្ឋបាលរាជធានី ខេត្ត ត្រូវចាត់វិធានការឱ្យបានម៉ឺងម៉ាត់ ចំពោះមន្រ្តីឃុំ សង្កាត់ណា ដែលបានអនុវត្តមិនប្រក្រតីណាមួយ ក្នុងកម្មវិធីឧបត្ថម្ភសាច់ប្រាក់នេះ ផងដែរ​។

សូមបញ្ជាក់ថា ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រដែលកំពុងកាន់បណ្ណសមធម៌ ក្នុងកំឡុងពេលនៃការរីករាលដាលនៃជំងឺកូវីដ-១៩ របស់រាជរដ្ឋាភិបាលកម្ពុជា គិតចាប់ពីថ្ងៃទី២៥ ខែមិថុនា ឆ្នាំ២០២០ មកដល់ខែធ្នូ ឆ្នាំ២០២០នេះ មានគ្រួសារក្រីក្រប្រមាណជាង៧០ម៉ឺនគ្រួសារ ឬប្រជាជនប្រមាណចាង២លាន៨សែននាក់ បានបើកប្រាក់ឧបត្ថម្ភរបស់រាជរដ្ឋាភិបាល។

ទន្ទឹមគ្នានេះ រាជរដ្ឋាភិបាល បានប្រកាសបន្តបើកផ្ដល់ប្រាក់ការឧបត្ថម្ភសាច់ប្រាក់ជុំទី៤ ចំនួន៣ខែបន្ថែមទៀត គឺសម្រាប់ខែមករា កុម្ភៈ និងខែមិនា ឆ្នាំ២០២១ ដើម្បីជួយសម្រួលដល់ជីវភាពរបស់ប្រជាជន​៕