រដ្ឋចំណាយថវិកាជាង ៧៧៥ លានដុល្លារ ជួយគ្រួសារក្រីក្រ និងងាយរងគ្រោះ​ពេលកូវីដ-១៩

រាជរដ្ឋាភិបាល បានចំណាយថវិកាជាង ៣ពាន់ប៊ីលានរៀល ឬត្រូវជាប្រមាណជាង៧៧៥លានដុល្លារអាមេរិក​ដើម្បីឧបត្ថម្ភទៅលើគ្រួសារក្រីក្រ និងងាយរងគ្រោះ នៅក្នុងអំឡុងពេលប្រយុទ្ធប្រឆាំងកូវីដ-១៩។

ថ្លែងនៅក្នុងវគ្គបណ្តុះបណ្តាលស្តីពី«នីតិវិធីបើកផ្តល់តាវកាលិកកម្មវិធីជំនួយសង្គម និងរបបឧបត្ថម្ភគោលនយោបាយ​សម្រាប់អតីតមន្ត្រីរាជការស៊ីវិល និងអតីតយុទ្ធជន» នៅថ្ងៃទី១២កញ្ញានេះ លោក ឈួរ សុបញ្ញា ប្រតិភូរាជរដ្ឋាភិបាល​ទទួលបន្ទុកជាអគ្គនាយកមូលនិធិជាតិជំនួយសង្គម បានឱ្យដឹងថា ជំនួយទាំងនេះ ត្រូវបានផ្តល់ដល់គ្រួសារក្រីក្រកម្រិត១ ជាង២៥ម៉ឺនគ្រួសារ និងគ្រួសារក្រីក្រកម្រិត២ ជាង៤៣ម៉ឺនគ្រួសារ។

លោក សំហេង បុរស រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមប្រឹក្សាភិបាលមូលនិធិជាតិជំនួយសង្គម មានប្រសាសន៍ថា កម្មវិធីឧបត្ថម្ភគ្រួសារក្រីក្រអំឡុងពេលប្រយុទ្ធប្រឆាំងនឹងជំងឺកូវីដ-១៩ ពិតជាបានផ្តល់អត្ថប្រយោជន៍​ដល់​ប្រជាជនក្រីក្រ ស្ត្រី មនុស្សវ័យចាស់ កុមារ ជនមានពិការភាព អ្នកផ្ទុកមេរោគអេដស៍ ព្រមទាំងបានបង្កើត​ប្រព័ន្ធគាំពារ​សង្គមមួយមានប្រសិទ្ធភាព និងចីរភាពហិរញ្ញវត្ថុ ដើម្បីបម្រើដល់គោលនយោបាយកាត់បន្ថយ និងទប់ស្កាត់ភាពក្រីក្រ ភាពងាយរងគ្រោះ។

គួរបញ្ជាក់ថា កាលពីមុនផ្ទុះជំងឺកូវីដ-១៩ រាជរដ្ឋាភិបាលបានចំណាយថវិកាលើមូលនិធិជាតិជំនួយសង្គមក្នុងមួយឆ្នាំ ខ្ទង់ជាង៣៦០ដុល្លារ សម្រាប់ជួយអន្តរាគមន៍ដល់គ្រួសារក្រីក្រ និងងាយរងគ្រោះ ប៉ុន្តែក្នុងអំឡុងពេលជួយវិបត្តិ​ជំងឺកូវីដ-១៩ និងវិបត្តិហិរញ្ញវត្ថុ ការចំណាយបានកើនដល់ជាង៧០០ដុល្លារអាមេរិក៕ សំអឿន