សមត្ថកិច្ច​ចុះបង្ក្រាបបទល្មើសនេសាទ​នៅស្រុកជល់គីរី​កម្ទេចរបាំងសាច់អួន​១ ពាន់ម៉ែត្រ​​

​សមត្ថកិច្ចចម្រុះនៃគណៈបញ្ជាការឯកភាពរដ្ឋបាលស្រុកជល់គីរី ខេត្តកំពង់ឆ្នាំង នៅព្រឹកថ្ងៃទី ១៣ ខែកញ្ញា ឆ្នាំ២០២២​បានសហការគ្នាចុះបង្ក្រាបបទល្មើសនេសាទនៅចំណុចភូមិឫស្សីដង្គួច ឃុំជលសា ស្រុកជល់គីរីដោយបានកាត់បំផ្លាញរបាំងសាច់អួនខុសច្បាប់ ១០ កន្លែងមានប្រវែង ១ពាន់ម៉ែត្រ។

​លោក មុត ម៉េង នាយករដ្ឋបាលសាលាស្រុកជល់គីរី ជាអ្នកដឹកនាំបង្ក្រាបបទល្មើស​នេសាទ​នេះបាន​ឲ្យដឹងថា កិច្ចប្រតិបត្តិការបង្ក្រាបបទល្មើសនេសាទនេះមានសមត្ថកិច្ចចម្រុះសរុបចំនួន ១៧នាក់ ប្រើប្រាស់មធ្យោបាយបាឡាស្មាច់ចំនួ ន​ ០៥គ្រឿងបានបង្ក្រាបបទល្មើសនេសាទរបាំងសាច់អួន​នៅ​ចំណុចបឹងត្រាំក្របី ស្ថិតនៅក្នុងភូមិឫស្សីដង្គួច ឃុំជលសា ជាលទ្ធផលរុះរើនិងបំផ្លាញចោល​របាំង​សាច់អួនចំនួន១០កន្លែងមានប្រវែង ១ ០០០ ម៉ែត្រ លូសាច់អួនចំនួន ១០ មាត់បង្គោលសរុប ៧០០ ដើម និងចាក់លែងកូនត្រីចំរុះចូលបឹងធម្មជាតិចំនួន ២៥០ គីឡូ។

រដ្ឋបាលស្រុកជល់គីរីអំពាវនាវដល់ប្រជានេសាទទាំងអស់សូមកុំប្រើប្រាស់ឧបករណ៍នេសាទល្មើសច្បាប់នាំឱ្យខាតបង់ថវិកាក្នុងគ្រួសារ ព្រោះបទល្មើសនេសាទនាំឱ្យបាត់​បង់ធនធាន​ជល​ផលជាតិដែលករណីនេះ អនុវត្តតាមបទបញ្ជារបស់ប្រមុខរាជរដ្ឋាភិបាលសមត្ថកិច្ច និងមិន​យោគ​យល់​អនុគ្រោះឲ្យនោះឡើយ៕

អត្ថបទ៖ ឈៀងថារិទ្ធ